ភ្នំពេញ៖ក្រោមព្យុះភ្លៀង ជីវិតដ៏ជូរចត់ ទម្រាំមានថ្ងៃ នេះ យឹម តាស្រង់ បានខិតខំព្យាយាមពុះជ្រៀកគ្រប់ឧបសគ្គ ដោយក្លាយជាកវីនិពន្ធវ័យក្មេង ដ៏ល្បីម្នាក់ ប្រចាំផលិតកម្មថោន និង ជាលំហូរសសៃឈាមដ៏សំខាន់ សម្រាប់ផលិតកម្ម វ័យក្មេងមួយនេះ។
តាស្រង់ មានស្នាដៃជាច្រើន ដែលតែងតែបម្រើដល់ សោតាអារម្មណ៍ ប្រិយមិត្ត ដោយស្តែងចេញតាមរយៈ ចម្រៀង និង រឿងកំប្លែង ដែលសុទ្ធសឹងជាស្នាដៃ ទទួលបានការគាំទ្រពីសំណាក់ មហាជន ទូទាំងប្រទេស ។ ក៏ប៉ុន្តែសម្រាប់ស្នាដៃទាំងនោះ ក៏ទទួលបានការរិះគន់យ៉ាងចាស់ដៃ ផងដែរ នាពេលកន្លងមក ជាក់ស្តែងបទចម្រៀងតែម្តង បើទោះបីជាបទទាំងនោះ មានទំនុកច្រៀងចេញ ពី ការគិត ស្រមើលស្រម៉ៃ ក៏ប៉ុន្តែ អ្វីដែលធ្វើឲ្យគេរិះគន់ នោះ គឺសាច់ភ្លេងដែលចម្លងពីគេ និងកែខ្លះៗ មកធ្វើជារបស់ខ្មែរតែប៉ុណ្ណោះ នេះ វាមិនខុសពីសុភាសិតខ្មែរ ពោលថា “ត្រីមួយកន្ទ្រក់ ស្អុយមួយគឺស្អុយទាំងអស់” ។ បញ្ច្រាសមកវិញ បើសិនជាដកត្រីស្អុយមួយនោះចេញទាន់ពេល ដោយយកត្រីស្អុយ ទៅធ្វើជាផ្អក ឬ ប្រហុក នោះវានឹងមានប្រយោជន៍រៀងខ្លួន ។
ក្រោយព្យុះភ្លៀង មេឃស្រឡះ ពិតជាត្រឹមត្រូវណាស់ គឺពពកខ្មៅ ដេរដាស់ និង លែងបង្ហាញខ្លួន ហើយការដកត្រី ស្អុយចេញក្នុងចំណោមត្រីស្រស់ជាច្រើនក្នុងមួយកន្ទ្រក់ បានធ្វើឲ្យផលិតកម្ម ថោន រីកមុខ ដូចគ្រាប់ជី ឡើងវិញ និងកាន់តែមានសន្ទុះ គាំទ្រទ្វេរដង លើស្នាដៃ ផលិតបទចម្រៀង កូនខ្មែរ ដោយបង្កើត Melody ថ្មី និងទំនុកច្រៀងថ្មី ទាំងស្រុង ។ ជាក់ស្តែងអ្វីទាំងអស់នេះ ដូចដែលយើងបានឃើញ ក្នុងវ៉ុល ចូលឆ្នាំ កន្លងទៅនេះ មានបទ ជាច្រើន រហូតដល់ទៅ ២៥ បទ ដែលជាបទស្នាដៃកូនខ្មែរ ដោយកើតចេញពី ការតាក់តែង និងបង្កើតបទភ្លេងថ្មី របស់ យឹម តាស្រង់ និង កវីជាច្រើនទៀត ដែលរួមទ្រនំ ជាមួយនឹងគ្នា ។
ក្នុងចំណោមបទ ភ្លេងថ្មី មិនចម្លងពីបណ្តាប្រទេសជិតខាង ដោយទៅណាក៏ឭ តែគេចាក់ព្រោងព្រាត ពីភូមិមួយ ទៅភូមិមួយ មានបទ “ខ្ញុំអញ្ជឹង” “អាប៉ូយចង់បានប្រពន្ធ” និងបទ “ឪក្មេកកាន់សីល” ។ ដោយឡែកបទចម្រៀងរបស់ផលិកម្មផ្សេងៗទៀត ស្ទើរតែមិនឭទៅហើយ នេះសបញ្ជាក់ថា ខ្មែរកំពុងមានការចាប់អារម្មណ៍ទៅលើស្នាដៃរបស់ខ្មែរ និងធ្វើឲ្យម្ចាស់ផលិតបទនេះ មានកំលាំងចិត្ត – កាយ ផលិត។
ទន្ទឹមជាមួយនឹងគ្នានេះដែរ តាស្រង់ ត្រូវបានគេចាត់ជាមនុស្សដ៏សំខាន់ របស់ ផលិតកម្មថោន ដោយមតិមួយចំនួនធំយល់ថា “យឹម តាស្រង់ ជាចំណុចបំពង់ក និងសរសៃឈាមបេះដូង របស់ផលិតកម្មថោន” ។ មូលហេតុដែលមហាជនយល់ឃើញយ៉ាងនេះ ដោយសារតែ យឹម តាស្រង់ ជាកវីលេចធ្លោក្នុងផលិតកម្មថោន និង ជាកវីដែលអាចផលិតបទចម្រៀងជាស្នាដៃកូនខ្មែរ បានច្រើន បើទោះបីជាមិនទាន់បានល្អ ១០០ ភាគរយក្តី ។ម្យ៉ាងវិញទៀត នៅក្នុងផលិតកម្មនេះ គេនៅមិនទាន់ឃើញ កវីផ្សេងទៀត អាចនិពន្ធទំនុកច្រៀង និង Melody ជាស្នាដៃកូនខ្មែរ បានច្រើន ដូច តាស្រង់ នៅឡើយ ហេតុដូចនេះ ទើបគេផ្តល់តម្លៃ ឲ្យកវីរូបនេះ យ៉ាងដូច្នោះ ។
លោក ហឿង ចាន់ទឹង ដែលជាបុគ្គលិកធ្វើការ នៅក្រុមហ៊ុនធ្វើគេហទំព័រ IT Sevice បានឲ្យដឹងថា “លោកក៏បានយល់ឃើញដូច្នោះដែរ ថា យឹម តាស្រង់ ជាចំណុចបំពង់ករបស់ផលិតកម្មថោន ដោយកន្លងមក តាំងពីផលិតកម្មនេះបើក លោកតែងតែគាំទ្រជានិច្ច បើទោះបីបទខ្លះចម្លងសាច់ភ្លេងពីគេក្តី តែពេលនេះវាមិនដូចគ្នានោះឡើយ ផលិតកម្មនេះ បានផលិតបទចម្រៀងស្នាដៃកូនខ្មែរ ច្រើនជាងគេ នាពេលបច្ចុប្បន្ន ដែលទាំងនេះ វាកើតចេញពីស្នាដៃកវី ល្បីឈ្មោះខាងលើ ។ លោកបានបន្តថា សង្ឈឹមថា បទចម្រៀងខ្មែរនិង ល្បីលើឆាកអន្តរជាតិ ដូចកូរ៉េ ទៅចុះ” ៕
មតិយោបល់