វេទិការសាធារណៈ ផ្សព្វផ្សាយនិងពិគ្រោះយោបល់ ដែលរៀបចំទ្បើងដោយអង្គការ អនាគតកុមារ សហការជាមួយក្រុមប្រឹក្សាសង្កាត់ និងគាំទ្រថវិកា ពីទីភ្នាក់ងារសហប្រតិបត្តិការអន្តរជាតិ ដើម្បីអភិវឌ្ឍន៍ របស់ប្រទេសស៊ុយអែត តាមរយៈអង្គការផែក កម្ពុជា បានប្រារព្វធ្វើនៅវត្ត កែវ សុវណ្ណ ស្ថិតនៅក្នុងសង្កាត់បន្ទាយដី ក្រុងពោធិ៍សាត់ ខេត្តពោធិ៍សាត់ ។
វេទិការដែលបានប្រារព្វធ្វើទ្បើងនេះ មានគោលបំណងផ្តល់ព័ត៌មាន និងបញ្ហាប្រឈមនានា ជូនដល់ប្រជាពលរដ្ឋ និងអង្គការសង្គមស៊ីវិល អំពីសមិទ្ធិផល ចំណូល ចំណាយ របស់ក្រុមប្រឹក្សាសង្កាត់ និងទទួលយកសំណូមពរ ធើ្វការឆ្លើយតប ចំពោះក្តីកង្វល់របស់ប្រជាពលរដ្ឋ និងដាក់បញ្ជូលទៅក្នុងផែនការអភិវឌ្ឍន៍បន្ត ។ ជាមួយគ្នានោះ ក៏បានរំពឹងទុកថា អ្នកដែលបានចូលរួម បានដឹងពីចំណូល ចំណាយ ពីតម្រូវការក្តីកង្វល់ និងបញ្ហាជាអាទិភាព ដើម្បីធ្វើការឆ្លើយតប ប្រកបដោយគណនេយ្យភាព និងតម្លាភាព ។
នៅក្នុងវេទិការនោះ ប្រជាពលរដ្ឋជាច្រើនអ្នក ដូចជាលោក កៃ ទិត តំណាងឲ្យប្រជាពលរដ្ឋនៅភូមិឥស្លាម បានលើកទ្បើងអំពីបញ្ហាបរិស្ថាននៅក្នុងភូមិ ដូចជាសម្រាម បញ្ហាក្លនិស្អុយ ពីការប្រកបអាជីវកម្ម ប៉ះពាល់ដល់ការរស់នៅ របស់ប្រជាពលរដ្ឋជិតខាង ល្បែងស៊ីសង អំពើហឹង្សាក្នុងគ្រួសារ កើតមាននៅក្នុងភូមិ ។ ក្រៅពីនោះ នៅមានបញ្ហាប្រឈមពាក់ព័ន្ធ ទៅនឹងហេដ្ឋារចនាសម្ព័ន្ធ និងការអនុវត្តគោល នយោបាយភូមិ ឃុំ មានសុវត្ថិភាពទាំង៩ចំណុច នៅមានកំរិត ដូច្ឆេះ បញ្ហាទាំងអស់នេះ ប្រជាពលរដ្ឋសំណូមពរឲ្យអាជ្ញាធរគ្រប់មូលដ្ឋាន វាគ្មិន និងអ្នកពាក់ព័ន្ធជួយមានវិធានការ ឆ្លើយតប និងរកដំណោះស្រាយជូនពូគគាត់ ឲ្យបានសមស្រប និងទាន់ពេលវេលា ។
ឆ្លើយតបនៅក្នុងវេទិការនោះ លោក យ៉ម យ៉ា អភិបាលរង នៃគណអភិបាលក្រុង និងលោក ម៉ែន សេដ្ឋា សមាជិកក្រុមប្រឹក្សាក្រុងពោធិ៍សាត់ បានជំរុញឲ្យអាជ្ញាធរមូលដ្ឋាន បង្កើនសកម្មភាពដូចភ្លៀងរលឹម ក្នុងការចុះជួយប្រជាពលរដ្ឋឲ្យបានត្រឹមត្រូវ ពោលគឺត្រូវចាត់ទុកប្រជាពលរដ្ឋជាធំ ។ កម្លាំងសមត្ថកិច្ច ទាំងនគរបាល និងប្រជាការពារ ត្រូវខិតខំរក្សាការពារសន្តិសុខ សណ្តាប់ធ្នាប់ ពិសេសអនុវត្តឲ្យខានតែបានគោលនយោបាយ ភូមិឃុំ មានសុវត្ថិភាព ឲ្យមានប្រសិទ្ធភាព ។
ពាក់ព័ន្ធទៅនឹងបញ្ហាប្រឈមនានា ដូចជាសម្រាម បញ្ហាក្លិនស្អុយ ធ្វើឲ្យប៉ះពាល់ដល់អ្នករស់នៅជិតខាងនោះ លោកនឹងរៀបចំគណកម្មការ ចុះធ្វើការត្រួតពិនិត្យ និងរកដំណោះស្រាយឲ្យបានទាន់ពេលវេលា ៕
មតិយោបល់