រាជធានីភ្នំពេញ ៖ រថយន្តប្រាដូពណ៌ទឹកប្រាក់មួយគ្រឿងបើកបរដោយយុវជនម្នាក់បានបើកបុកគូទរថយន្តវីហ្គោ ពណ៌ខ្មៅ មួយគ្រឿងចំពីក្រោយពេញទំហឹងបណ្ដាលអោយរថយន្តប្រាដូរងការខូចខាតមួយកំណាត់មុខ និងធ្វើអោយរថយន្តវីហ្គោរងការខូចខាតខាតមួយកំណាត់ខាងក្រោយ ធ្លាយចេញឈើប្រណិត៣ដុំ ដែលហេតុការណ៍នេះបង្កការភ្ញាក់ផ្អើល កាលពីវេលាម៉ោង២និង៥០នាទីរំលងអធ្រាត្រ ឈានចូលថ្ងៃ ទី ២១ ឧសភា ២០១៤នៅចំណុចមុខភោជនីដ្ឋាន ពីរ៉ាមីត តាមផ្លូវ១៩៨៦ ស្ថិតនៅក្នុងសង្កាត់ភ្នំពេញថ្មី ខណ្ឌសែនសុខ។
សាក្សីនៅកន្លែងកើតហេតុបានអោយដឹងថា មុនពេលកើតហេតុគេឃើញរថយន្តប្រាដូ ពណ៌ទឹកប្រាក់ ពាក់ស្លាកលេខ 2J-1763 បើកដោយយុវជនម្នាក់បានធ្វើដំណើរយ៉ាងលឿនតាមបណ្ដោយផ្លូវ១៩៨៦ ក្នុងទិសដៅពីកើតទៅលិច មកដល់ចំណុចមុខភោជនីដ្ឋានពីរ៉ាមីត ក៏បានទៅបុកពីក្រោយរថយន្តម៉ាក VIGO ពណ៌ខ្មៅ ពាក់ស្លាកលេខ បណ្តោះអាសន្ន 5506 ចំពីក្រោយពេញទំហឹងបណ្តាលរថយន្តប្រាដូរងការខូចខាតមួយកំណាត់ ខាងមុខចំណែករថយន្ត VIGOរងការខូចខាតមួយកំណាត់ខាងក្រោយ ហើយក្អួតចេញឈើប្រណិត៣ដុំ ធ្លាក់ពេញផ្លូវ តែត្រូវបានម្ចាស់រថយន្តVIGOលើកដាក់លើរថយន្តវិញ។
ក្រោយពេលកើតហេតុម្ចាស់រថយន្តវីហ្គោបានទាមទារសំណងពីម្ចាស់រថយន្តប្រាដូចំនួន៥ពាន់ដុល្លារ ដើម្បីបញ្ចប់រឿងនៅកន្លែងកើតហេតុតែម្ចាស់រថយន្តប្រាដូមិនព្រមក៏ធ្វើការទាក់ទងទៅសមត្ថកិច្ចអោយ ធ្វើការវាស់វែងយករថយន្តទាំង២គ្រឿងទៅរក្សាទុកនៅអធិការដ្ឋាននគរបាលខណ្ឌសែនសុខរងចាំការដោះស្រាយតាមក្រោយ។ តែពេលសមត្ថកិច្ចខណ្ឌសែនសុខចុះទៅដល់កន្លែងកើតហេតុធ្វើអោយម្ចាស់រថយន្តវីហ្គោមានអារម្មណ៍ភ័យតក់ស្លុតព្រោះរថយន្តរបស់ខ្លួនមានដឹកឈើប្រណិត៣ដុំក៏សុំឱ្យម្ចាស់រថយន្តប្រាដូយករថយន្តរបស់គាត់ ទៅជួសជុលនៅយានដ្ឋានក្បែរនោះទៅ ព្រោះគាត់មិនចង់វែងឆ្ងាយហើយភាគីខាងម្ចាស់ រថយន្តប្រាដូ ក៏យល់ព្រមទៅព្រោះគាត់ក៏មិនចង់វែងឆ្ងាយដែរ៕
មតិយោបល់