ភ្នំពេញ ៖ បុរសជនជាតិម្នាក់បានបើករថយន្តមួយគ្រឿងដោយរួមដំណើរដោយបុរស០២ នាក់ទៀត បានបើកទៅគៀរថយន្តមួយគ្រឿងទៀតដែលចតនៅចិញ្ចើមផ្លូវខ្ទេចមួយចំហៀងខាងឆ្វេងហើយព្យាយាមបើករត់គេចខ្លួនក៏ជ្រុលទៅបុកម៉ូតូមួយគ្រឿងទៀតបណ្តាលរថយន្តបង្កក្រឡាប់ ហើយអ្នកជិះម៉ូតូរបួសធ្ងន់ស្រាល ។ ហេតុការណ៏នេះកើតឡើងកាលពីវេលាម៉ោង ១២និង៣០នាទីរំលងអាធ្រាត្រ ឈានចូលថ្ងៃទី ២២ខែឧសភាឆ្នាំ២០១៤ នៅចំណុចមុខធនាគារ ABA Bank តាមផ្លូវព្រះសីហនុ ស្ថិតក្នុងសង្កាត់បឹងកេងកង៣ ខណ្ឌចម្ការមន។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុ គេបានឃើញរថយន្តឡិចស៊ីស RX470 មួយគ្រឿងពណ៌ខ្មៅ ពាក់ស្លាកលេខ ភ្នំពេញ 2E-2529 បើកបរដោយបុរសជនជាតិចិនម្នាក់និងរួមដំណើរដោយបុរស២នាក់ទៀត បានបើកទៅគៀរថយន្តមួយគ្រឿងម៉ាកកាមរីឆ្លាម ពណ៌ខ្មៅ ពាក់ស្លាកលេខភ្នំពេញ 2D-1105 ចតស្ងៀមក្បែរចិញ្ចើមផ្លូវធ្វើឲ្យរងការខូចខាតខ្ទេចមួយជំហៀងខាងឆ្វេង ហើយរថយន្តបង្កបានព្យាយាមបើករត់ តាមបណ្ដាយផ្លូវព្រះសីហនុ ក្នុងទិសដៅពីកើតទៅលិចក្នុងល្បឿនលឿន ខណ:មកដល់ស្ដុបកែងផ្លូវ៦៣(ផ្លូវត្រសក់ផ្អែម)ក៏បានជ្រុលទៅបុកម៉ូតូស្កុបពីមួយគ្រឿង ពណ៌ផ្កាឈូក ពាក់ស្លាកលេខ ភ្នំពេញ 1CC-8557 ដែលជិះដោយបុរសនារី២នាក់ បណ្តាលឱ្យរបួសធ្ងន់ស្រាល ចំណែករថយន្តបានក្រឡាប់និងអ្នកបើកបររថយន្តសន្លប់នៅនិងកន្លែង។
ក្រោយពេលកើតហេតុជនរងគ្រោះរបួសធ្ងន់ស្រាល ត្រូវបានគេបញ្ជូនទៅសង្គ្រោះនៅមន្ទីរពេទ្យ ចំណែករថយន្តបង្កនិងម៉ូតូត្រូវបានសមត្ថកិច្ចនគរបាលធ្វើការវាស់វែងយកទៅរក្សាទុកដើម្បីរង់ចាំធ្វើការដោះស្រាយតាមផ្លូវច្បាប់៕
មតិយោបល់