ក្រោយពីប្រកាសច្បាប់អាជ្ញាសឹកនៅក្នុងប្រទេសថៃ សហរដ្ឋអាមេរិកបាននិយាយថា អាមេរិកមិនជឿថា យោធាថៃជាប់ពាក់ព័ន្ធនឹងការធ្វើរដ្ឋប្រហារនោះទេ ប៉ុន្តែបានជំរុញឲ្យយោធាថៃគោរពស្ថាប័នប្រជាធិបតេយ្យ។ នេះបើយោងតាមសំដីរបស់នាំពាក្យក្រសួងការបរទេសសហរដ្ឋអាមេរិក លោកស្រី Jen Psaki បានប្រាប់អ្នកសារព័ត៌មាន។
លោកស្រី Psaki ថ្លែងថា “កងទ័ពថៃបានថ្លែងជាសាធារណ:ថា វាគ្រាន់តែជាសកម្មភាពបណ្ដោះអាសន្នតែប៉ុណ្ណោះ។ យើងសង្ឃឹមថា គេនឹងអនុវត្តតាមសំដីរបស់គេ”។
អ្នកនាំពាក្យរូបនេះបានថ្លែងបន្តទៀតថា សហរដ្ឋអាមេរិកបានទាក់ទងជាទៀងទាត់ជាមួយកងទ័ពថៃ ជំរុញឲ្យមានភាពស្ងប់ស្ងាត់ ការពារសិទ្ធិសេរីភាពសាធារណ: ធានាសិទ្ធិបញ្ចេញមតិ និងសេរីភាពសារព័ត៌មានជាដើម។
អ្នកការទូតជាន់ខ្ពស់សហរដ្ឋអាមេរិកប្រចាំអាស៊ីអាគ្នេយ៍ Danny Russel អំពាវនាវឲ្យរដ្ឋាភិបាលចាំផ្ទះថៃបន្តការងារតទៅទៀត ដោយសន្យាថានឹងរៀបចំការបោះឆ្នោតដ៏ត្រឹមត្រូវនាថ្ងៃទី៣ ខែកក្កដា ខាងមុខ។
គួររំលឹកផងដែរថា ថៃគឺជាសម្ព័ន្ធមិត្តដ៏ចាស់ជាងគេបំផុតរបស់សហរដ្ឋអាមេរិកនៅអាស៊ី ហើយសហរដ្ឋអាមេរិកបានព្រួយបារម្ភនឹងការចូលពាក់ព័ន្ធនឹងនយោបាយដ៏វឹកវរនៅក្នុងអាណាចក្រនេះ ដែលគេធ្លាប់ដឹងថាមានការប៉ុនប៉ងធ្វើរដ្ឋប្រហារ និងរដ្ឋប្រហារយោធាចំនួន១៨ លើករួចមកហើយ តាំងពីប្រទេសនេះបានផ្លាស់ទៅជារាជាណាចក្រអាស្រ័យរដ្ឋធម្មនុញ្ញនៅឆ្នាំ១៩៣២មក៕
មតិយោបល់