ផ្ទះល្វែងឈើលើថ្មរក្រោមចំនួន១០ខ្នង ព្រមទាំងផ្ទះលក់ដូរអីវ៉ាន់ចំនួន ១០ខ្នង ជាប់ផ្សារចាស់ក្នុង ទីរួមស្រុកអន្លង់វែង ត្រូវអគ្គីភ័យបានលេបត្របាក់ទាំងស្រងដោយបន្សល់ទុកតែផេះ ហើយផ្ទះមួយចំនួនទៀត ក៏រងការបំភ្លេចបំផ្លាញតិចតួចក្នុងផងដែរក្នុងរយៈ៣ម៉ោង ហេតុការនេះបានកើតឡើងនៅវេលាម៉ោង១០ និង៣០នាទី រហូតដល់ម៉ោង១រសៀល ថ្ងៃទី២៣ ខែឧសភា ឆ្នាំ២០១៤ ស្ថិតនៅក្នុងភូមិអូរជញ្ជៀន ឃុំអន្លង់វែង ស្រុកអន្លង់វែង ខេត្តឧត្តរមានជ័យ។
ក្នុងហេតុការណ៍គ្រោះមហន្តរាយអគ្គីភ័យកំពុងឆាបឆេះយ៉ាងសណ្ធរសណ្ធៅ ភ្លាមៗនោះក៏មានការជួយអន្តរាគមន៍របស់សមត្ថកិច្ចជាច្រើនដូចជា កម្លាំងកងរាជអាវុធហត្ថស្រុក និងកងរាជអាវុធហត្ថទិស កម្លាំងអធិការដ្ឋាននគរបាលស្រុក នគរបាលព្រំដែន និងកម្លាំងយោធាពលតូចថ្មើរជើងលេខ៤១ ព្រមទាំងប្រជាពលរដ្ឋបានចុះជួយអន្តរាគមន៍ដងទឹកបាច់ពន្លត់ភ្លើង និងម៉ូតូរ៉ឺម៉ក់ដឹកទឹកដើម្បីជួយបាញ់ពន្លត់ភ្លើង ហើយក៏មានរថយន្តពន្លត់អគ្គីភ័យរបស់លោកឧកញ៉ា លឹម ហេង ក៏បានចុះជួយអន្តរាគមន៍ភ្លាមៗ ក៏ប៉ុន្តែមិនអាចពន្លត់ភ្លើងបាន ដោយសារទីតាំងកើតហេតុភ្លើងឆេះមានអាកាសធាតុខ្យល់ខ្លាំងដូចជម្រុញអណ្តាតភ្លើងរាលដាលទៅផ្ទះផ្សេងៗទៀត រហូតដល់រថយន្តអន្លត់អគ្គីភ័យរបស់ស្នងការនគរបាលខេត្តឧត្តរមានជ័យ អន្តរាគមន៍ពន្លត់ និងបាញ់ទឹកស្កាត់ភ្លើង មិនឱ្យឆ្លងរាលដាលទៅផ្ទះផ្សេងៗ ទៀតទីបំផុតដោយមានការជួយអន្តរាគមន៍ពន្លត់ភ្លើងពីអាជ្ញាធរ សមត្ថកិច្ច និងប្រជាពលរដ្ឋ អស់រយៈពេល៣ម៉ោង ទើបស្ថានភាពភ្លើងបានរលត់ទៅវិញ នៅវេលាម៉ោង១រសៀល។
ប្រភពព័ត៌មានពីសមត្ថកិច្ចបានឱ្យដឹងថា ក្នុងគ្រោះអគ្គីភ័យប្រភពដើមចមបានឆាបឆេះចេញពីក្នុងផ្ទះលក់ផ្អកប្រហុករបស់ស្ត្រីម្នាក់ឈ្មោះ ស៊ុន សុជា ជាស្ត្រីមេម៉ាយ ដែលគាត់បានបើកកង្ហាលដេកនៅក្នុងផ្ទះក្រោយបាយរួច នៅវេលាម៉ោង១១ ថ្ងៃត្រង់ ហើយព្រីកង្ហាលបានឆ្លងផ្ទុះសេខ្សែរភ្លើងឆេះ រហូតឆេះដោយភ្លើងខ្លាំង ទើបគាត់ភ្ញាក់ដឹងខ្លួនពីដេក ក៏បានស្រែកហៅឱ្យអ្នកនៅក្បែរជួយ ដងទឹកមកជួយពន្លត់ភ្លើង តែដោយសារអណ្តាតភ្លើងឆេះខ្លាំង និងអាកាសធាតុមានខ្យល់ ហើយក្នុងផ្ទះរបស់គាត់មានសំភារៈកំប៉ុង ធុង និងពីដុងជ័រច្រើន ភ្លើងក៏បានឆាប់ឆេះយ៉ាងសណ្ធរសណ្ធៅ និងរាលដាលដល់ផ្សេងៗទៀត។
ក្នុងហេតុការណ៍អគ្គីភ័យកំពុងឆេះ ក៏មានវត្តមានរបស់ឯកឧត្តម ស ថាវី អភិបាលខេត្តឧត្តរមានជ័យនិងឯកឧត្តមឧត្តមសេនីយ៍ត្រី ម៉ែន លី ស្នងការនគរបាលខេត្តឧត្តរមានជ័យ បានចុះមកបញ្ជាផ្ទាល់ដល់កម្លាំងសមត្ថកិច្ចគ្រប់ជំនាញ និងរៀបចំសណ្ឋាប់ធ្នាប់ចរាចរណ៍នៅតាមដងផ្លូវ ដើម្បីបង្កលក្ខណៈងាយស្រួលដល់រថយន្តពន្លត់អគ្គីភ័យ ចូលបាញ់ទឹកពន្លត់ភ្លើង និងទប់ស្កាត់មិនឱ្យឆេះរាលដាលទៅផ្ទះប្រជាពលរដ្ឋផ្សេងៗទៀតហើយគេនៅមិនទាន់ដឹងពីទំហំនៃការខូចខាតអស់ប៉ុន្មាននោះទេ៕
មតិយោបល់