ភ្នំពេញ ៖ ម៉ូតូ២គ្រឿងបុកគ្នាពេញទំហឹងនៅចំណុចផ្លូវជាតិលេខ៤ បណ្តាលឲ្យមនុស្សបីនាក់រងរបួសធ្ងន់ធ្ងរ កាលពីវេលាម៉ោង៧និង២០នាទីយប់ថ្ងៃទី២៥ខែឧសភាឆ្នាំ២០១៤ ស្ថិតនៅសង្កាត់កន្ទោក ខណ្ឌពោធិ៍សែនជ័យ។
ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុគេបានឃើញបុរសម្នាក់បានជិះម៉ូតូម៉ាកស៊ុយស៊ូគីស្មាស់ ពណ៌ខ្មៅ ពាក់ស្លាកលេខ សៀមរាប 1E-6418 បានជិះធ្វើដំណើរតាមបណ្ដោយផ្លូវជាតិលេខ៤ ទិសដៅពីលិចទៅកើតបញ្ច្រាស់ផ្លូវ ក៏បានជ្រុលមកបុកម៉ូតូមួយគ្រឿងម៉ាកស៊ុយស៊ូគីស្មាស់ ពណ៌ក្រហមបិតតែមខ្មៅ ពាក់ស្លាកលេខ ភ្នំពេញ 1AD-6816 ដែលជិះដោយបុរស២នាក់ទិសដៅពីកើតទៅលិច ក៏បណ្ដាលអោយម៉ូតូទាំង២គ្រឿងបុកគ្នាចំពេញទំហឹងធ្វើអោយម្ចាស់ម៉ូតូរងរបួសធ្ងន់ត្រូវបានរថយន្តសាមុយដឹកយកទៅមន្ទីរពេទ្យ២នាក់ភ្លាមៗ ចំណែកម្នាក់ទៀតក៏រងរបួសធ្ងន់ដែរតែមិនព្រមទៅមន្ទីរពេទ្យឡើយព្រោះខ្លាចបាត់ម៉ូតូរបស់ខ្លួន។
បន្ទាប់ពីកើតហេតុសមត្ថកិច្ចបានចុះមកវាស់វែងនិងយកម៉ូតូទាំង២គ្រឿងទៅរក្សាទុកដើម្បីរង់ចាំធ្វើការដោះស្រាយតាមផ្លូវច្បាប់៕
មតិយោបល់