លោក មុំ សុទ្ធារ៉ា ជាអនុប្រធានអធិការកិច្ច អគ្គនាយកដ្ឋានរតនាគារជាតិ ត្រូវបានប្រកាសតែងតាំងជា ប្រធានមន្ទីរសេដ្ឋកិច្ច និងហិរញ្ញវត្ថុខេត្តព្រះវិហារថ្មី កាលពីព្រឹកថ្ងៃទី៣ មេសានេះ បន្ទាប់ពីប្រធានមន្ទីរមុន បានចូលនិវត្តន៍ ។
លោក មាស រដ្ឋាវុឌ្ឍ ប្រធានមន្ទីរសេដ្ឋកិច្ច និងហិរញ្ញវត្ថុខេត្តព្រះវិហារ ដែលត្រូវចូលនិវត្តន៍ ក៏បានលើកឡើង ជាច្រើននូវកិច្ចការងារ ដែលខ្លួនបាន បំពេញកន្លងទៅរហូតមកដល់ថ្ងៃចូលនិវត្តន៍នេះ ។
លោក អ៊ុំ ម៉ារ៉ា អភិបាលខេត្តព្រះវិហារ ក៏បានមានប្រសាសន៍ថា កន្លងទៅមន្ទីរសេដ្ឋកិច្ច និងហិរញ្ញវត្ថុខេត្តព្រះវិហារ បានបំពេញភារៈកិច្ច បានយ៉ាងល្អ ហើយមកដល់ថ្ងៃនេះ គឺជាថ្ងៃចូលនិវត្តន៍របស់ប្រធានមន្ទីរចាស់ និងតែងតាំងប្រធានមន្ទីរថ្មីបន្តដឹកនាំមន្ទីរឲ្យកាន់តែល្អប្រសើរជាងនេះទៅទៀត។
នាឱកាសនោះដែរ ឯកឧត្តម ញាណ ឡេង អនុរដ្ឋលេខាធិការក្រសួង សេដ្ឋកិច្ច និងហិរញ្ញវត្ថុខេត្តព្រះវិហារ ក៏បានមានប្រសាសន៍ផ្តាំផ្ញើដល់ ប្រធានមន្ទីរសេដ្ឋកិច្ច និងហិរញ្ញវត្ថុខេត្តព្រះវិហារថ្មី ដែលរាជរដ្ឋាភិបាលបានប្រគល់តួនាទីជូន ត្រូវធ្វើយ៉ាងណា បន្តដឹកនាំមន្ទីរនេះឲ្យបានហ្មត់ចត់ និងត្រូវពង្រឹងផ្ទៃក្នុង ក្នុងមន្ទីរឲ្យបានរឹងមាំថែមទៀត ដើម្បីទទួលនូវការ ទំនាក់ទំនងគ្នាល្អរវាងមន្ត្រីក្រោមឱវាទ ជាពិសេស គឺជួយអភិវឌ្ឈន៍ប្រទេស ជាតិឲ្យមានការរីកចម្រើន ។
ក្នុងពេលនោះដែរ ឯកឧត្តម ញាណ ឡេង ក៏បានប្រគល់ សេចក្តីសម្រេចតែងតាំង និងត្រាជូនប្រធានមន្ទីរថ្មីផងដែរ ។
នាពេលនោះដែរ លោក មុំ សុទ្ធារ៉ា ប្រធានមន្ទីរសេដ្ឋកិច្ច និងហិរញ្ញវត្ថុ ដែលទើបតែនឹងតែងតាំងថ្មី ក៏បានធ្វើសេចក្តីប្តេជ្ញាចិត្តថា នឹងយកចិត្តទុកដាក់ក្នុងភារៈកិច្ចដែលខ្លួនទើបតែទទួលបានថ្មី និងពង្រឹងនូវសាមគ្គី ផ្ទៃក្នុង រវាងមន្ត្រីក្រោមឱវាទទាំងអស់ ប្រកបដោយការទទួលខុសត្រូវនឹងមាន ប្រសិទ្ធភាពខ្ពស់ ព្រមបង្កើននូវកិច្ចសហប្រតិបត្តិការជាមួយមន្ទីរជំនាញ អង្គភាពនានាក្នុងខេត្តឲ្យកាន់តែល្អប្រសើរ៕
មតិយោបល់