ភ្នំពេញ ៖ អគ្គិភ័យមួយបានបង្កអោយមានការភ្ញាក់ផ្អើល ដល់ប្រជាពលរដ្ឋនិងសមត្ថកិច្ចចុះអន្តារគមន៍ដោយសារបន្ទប់ខារ៉ាអូខេលេខ៣៧ យីហោ១៦៨ មានអណ្ដាតភ្លើងឆាបឆេះបង្កឱ្យមានការភ្ញាក់ផ្អើលទាំងនារីធ្វើការនៅទីនោះនិងភ្ញៀវដែលចូលទៅច្រៀងរត់ចេញប្រសាច កាលពីវេលាម៉ោង១១និង១០នាទីយប់ថ្ងៃទី២៩ខែឧសភាឆ្នាំ២០១៤ ស្ថិតនៅក្នុងសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។
ប្រភពព័ត៌មានពីកន្លែងកើតហេតុបានឱ្យដឹងថា បន្ទប់ដែលមានអគ្គិភ័យឆាបឆេះនេះ គឺមិនមានភ្ញៀវចូលច្រៀងទេ ប៉ុន្តែបន្ទប់ក្បែរនោះមានភ្ញៀវចូលច្រៀង ហើយនៅមុនមានការភ្ញាក់ផ្អើលគឺនារីៗធ្វើការនៅទីនោះធុំក្លិនឈ្ងៀមនិងផ្សែងហុយចេញមក ក៏ដើរទៅបើកទ្វារមើលទើបដឹងថាមានអណ្ដាតភ្លើងឆាបឆេះនៅក្នុងបន្ទប់នោះទើបបង្កអោយមានការភ្ញាក់នាំគ្នារត់ចេញយ៉ាងប្រសេចប្រសាច។
ភ្លាមរថយន្តពន្លត់អគ្គិភ័យមួយគ្រឿងបានចេញអន្តរាគមន៍ទៅដល់កន្លែងកើតហេតុ ប៉ុន្តែមិនបានបាញ់ទឹកពន្លត់ភ្លាមៗទេ ដោយសារតែផ្លូវចូលពិបាកក្នុងការបាញ់ពន្លត់។ គេមិនទាន់ដឹងថាអគ្គិភ័យនេះបណ្តាលមកពីមូលហេតុអ្វីនោះទេ។
តែជាជំហានដំបូងសមត្ថកិច្ចបានសន្និដ្ឋានថាអាចបង្កដោយការទុស្សេចរន្តអគ្គិសនី ឬក៏អាចបណ្ដាលមកពីមានភ្ញៀវជក់បារីហើយចោលកន្ទុយបារីចូលទៅក្នុងបន្ទប់បណ្ដាលអោយមានភ្លើងឆាបឆេះតែម្ដង ប៉ុន្តែចំពោះមូលហេតុពិតប្រាកដរង់ចាំសមត្ថកិច្ចធ្វើការស្រាវជ្រាវបន្តតើបណ្ដាលមកពីអ្វី?នៅក្នុងហេតុការណ៍នោះគេក៏បានឃើញសមត្ថកិច្ចមូលដ្ឋានក៏ដូចជាអាជ្ញាពាក់ព័ន្ធចុះមកត្រួតពិនិត្យមើលផងដែរ។
បន្ទាប់ពីកើតហេតុជិតកន្លះម៉ោងរថយន្តពន្លត់អគ្គិភ័យចំនួន១៥គ្រឿងបានចុះជួយអន្តរាគន៍បាញ់ពន្លត់ភ្លើងដោយប្រើរយៈពេលជិត២ម៉ោងទើបអាចគ្របគ្រងស្ថានការណ៍បានទាំងស្រុង។ ដោយអគ្គិភ័យបានលេបត្របាក់អស់បន្ទប់ខារ៉ាអូខេចំនួន៨បន្ទប់នៅជាន់ទី២ទាំងស្រុងនិងពុំបណ្ដាលអោយឆេះរាលដាលដល់ផ្ទះប្រជាពលរដ្ឋរស់នៅក្បែរនោះទេ៕
មតិយោបល់