សេចក្តីប្រកាសព័ត៌មានរបស់អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក)កាល ពីថ្ងៃទី ២៩ ខែឧសភា ឆ្នាំ ២០១៤ បានឲ្យដឹងថា អ.វ.ត.ក នឹងប្រកាសសាលក្រមលើពិរុទ្ធជន ចំនួនពីររូបក្នុងគឺលោក នួន ជា និងលោក ខៀវ សំផន នៅថ្ងៃទី ៧ ខែសីហា ឆ្នាំ ២០១៤ ខាង មុខនេះ។
អង្គជំនុំជម្រះសាលាដំបូង នៃ អ.វ.ត.ក បានប្រកាសថា សាលក្រម នៃសំណុំរឿង ០០២/០១ ពាក់ព័ន្ធនឹងលោក នួន ជា អតីតអនុលេខាបក្សកុម្មុយនិស្តកម្ពុជា និងលោក ខៀវ សំផន អតីតប្រមុខរដ្ឋ នៃរបបកម្ពុជាប្រជាធិបតេយ្យនឹង ត្រូវប្រកាសនៅថ្ងៃព្រហស្បតិ៍ទី ៧ ខែ សីហា ឆ្នាំ២០១៤ វេលាម៉ោង ៩ ព្រឹក នៅក្នុងសាលសវនាការធំនៃ អ.វ.ត.ក។
សេចក្តីប្រកាសព័ត៌មានបានបន្តថា “ក្នុងសំណុំរឿង ០០២/០១ នេះ ជនជាប់ចោទទាំង ពីរ ដែលសវនាការលើសំណុំ រឿងនេះបាន ចាប់ផ្ដើម នៅខែវិច្ឆិកា ឆ្នាំ ២០១១ និងបានធ្វើសេច ក្ដីសន្និដ្ឋានបិទបញ្ចប់កិច្ចពិភាក្សា ដេញដោលនៅខែតុលា ឆ្នាំ ២០១៣ ។
ក្នុងសំណុំរឿងនេះ ផ្ដោតសំខាន់លើឧក្រិដ្ឋកម្មប្រឆាំងមនុស្សជាតិ ដែលពាក់ព័ន្ធនឹងការផ្លាស់ប្ដូរទីលំនៅប្រជាជន ដោយបង្ខំចិត្ដចេញ ពីភ្នំពេញ កាលពីខែមេសា ឆ្នាំ ១៩៧៥ និងផ្លាស់ទីលំនៅប្រជាជនចេញពីតំបន់ផ្សេងៗទៀត ក្នុងដំណាក់កាលក្រោយទៀត និងការ សម្លាប់ទាហាននៃរបបសាធារណរដ្ឋខ្មែរ នៅទួលពោធិ៍ជ្រៃ ក្នុងខេត្តពោធិ៍សាត់ ។ ជាមួយគ្នានោះសេចក្តីប្រកាសបានបញ្ជាក់ផងដែរថា ប្រសិនបើរកឃើញថាមានពិរុទ្ធភាពនោះសេចក្ដីសម្រេចអំពីការផ្ដន្ទាទោស និងអំពីការទាមទារសំណងរបស់ដើមបណ្ដឹងរដ្ឋប្បវេណី ក៏នឹងត្រូវប្រកាសនៅក្នុងនោះផងដែរ។
សាលាក្តីកាត់ទោសអតីតមេដឹកនាំខ្មែរក្រហម ត្រូវបានបង្កើតឡើងរួមគ្នាដោយអង្គការ សហប្រជាជាតិ និងរាជរដ្ឋាភិបាលកម្ពុជាកាល ពីឆ្នាំ ២០០៦ កន្លងទៅ ហើយមកដល់ឆ្នាំ២០១៤ នេះសាលាក្តីចម្រុះមួយនេះបានចំណាយថវិកាសរុបរាប់រយលានដុល្លារហើយ ហើយមួយវិញទៀតតុលាការមួយនេះក៏ធ្លាប់បានជួបប្រទះ នឹងភាពរកាំរកូសជាច្រើនលើកច្រើនសារមកហើយផង ដែរដោយសារតែបុគ្គលិកខាងជាតិ ដែលបានកំពុងបម្រើនៅក្នុងស្ថាប័ននេះបានជួបប្រទះនឹងកង្វះខាត់ថវិការ ។ យ៉ាងណាក្តីនាពេលបច្ចុប្បន្នបុគ្គលិកផ្នែកជាតិនៅបន្តធ្វើការរបស់ខ្លួនដដែល បន្ទាប់ពីមានជំនួយជាបន្តបន្ទាប់ពីជាតិ និងអន្តរជាតិនោះ៕
មតិយោបល់