ក្រុមហ៊ុនផលិតរថយន្តតូយ៉ូតា នៅថ្ងៃពុធទី១១ខែមិថុនា ឆ្នាំ ២០១៤ នេះ បានប្រកាសឲ្យដឹងថា ខ្លួនបានប្រមូលរថយន្តប្រមាណ ២,២៧លានគ្រឿងនៅជុំវិញពិភពលោក ដោយសារបញ្ហាពោងសុវត្ថិភាព ដែលអាចបង្កឲ្យមានគ្រោះថ្នាក់។
ក្រុមហ៊ុនផលិតរថយន្តធំជាងគេមួយនេះ បាននិយាយថា នេះជាការប្រមូលរថយន្តចុងក្រោយដ៏ធំមួយដែលមានរហូតដល់ទៅ ២០ម៉ូដែល ក្នុងនោះរួមមាន Corolla sedan, Yaris និង Noah minivan ចំនួន ១,៦២លានគ្រឿងនៅជុំវិញពិភពលោក និង ៦៥០.០០០គ្រឿងនៅក្នុងប្រទេសជប៉ុន។
រថយន្តមួយចំនួនត្រូវបានប្រមូលម្ដងរួចទៅហើយកាលពីឆ្នាំមុន ប៉ុន្តែមានម្ចាស់រថយន្តមួយចំនួនមិនបាននាំយករថយន្តមកធ្វើការផ្លាស់ប្ដូរពោងសុវត្ថិភាពនោះទេ ដូច្នេះហើយទើបតម្រូវឲ្យក្រុមហ៊ុនប្រកាសប្រមូលម្ដងទៀត។
ក្រុមហ៊ុនបានបញ្ជាក់ថា ថ្មីៗនេះ មានអតិថិជនរបស់ខ្លួននៅក្នុងប្រទេសជប៉ុនបានរាយការណ៍ឲ្យដឹងថា រថយន្តរបស់គាត់បានកើតមានបញ្ហាទៅលើពោងសុវត្ថិភាព ប៉ុន្តែមិនបណ្ដាលឲ្យមានរបួសនោះទេ។
កាលពីខែមេសាកន្លងទៅនេះ ក្រុមហ៊ុនតូយ៉ូតា បានប្រមូលរថយន្តជាទ្រង់ទ្រាយធំរហូតដល់ទៅ ៦.៣៩លានគ្រឿងនៅជុំវិញពិភពលោក ហើយកាលពីខែឧសភាមុននេះ ក៏បានប្រមូលរថយន្ត ៥២០.០០០គ្រឿងមកជួសជុលផងដែរ។
គួរបញ្ជាក់ផងដែរថា កាលពីខែមីនា ក្រុមហ៊ុនតូយ៉ូតាបានយល់ព្រមបង់ប្រាក់ពិន័យ ១,២ពាន់លានដុល្លារអាមេរិក ដើម្បីដោះស្រាយការចោទប្រកាន់បទព្រហ្មទណ្ឌ ដោយបានកុហកនិយ័តករ និងសាធារណជន និងព្យាយាមពន្យាពេលក្នុងការប្រមូលរថយន្ត៕
មតិយោបល់