ភ្នំពេញ៖ នៅថ្ងៃទី១១ខែមិថុនាឆ្នាំ ២០១៤ កន្លងទៅនេះ ខុទ្ទកាល័យរបស់សម្ដេចហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានប្រកាសប្រាប់មន្ត្រីរដ្ឋាភិបាលទូទាំងប្រទេសអំពីការឆបោក ឲ្យផ្ទេរលុយតាមលេខទូរស័ព្ទជាថ្នូរនឹងការដំឡើងបុណ្យស័ក្ដិ។ នេះបើយោងតាមការចុះផ្សាយរបស់កាសែតខេមបូឌា ដេលី។
https://i1272.photobucket.com/albums/y389/domneng/wing-home_zpsf7133883.jpg
យោងតាមប្រភពខាងលើបានឲ្យដឹងថា សេចក្ដីប្រកាសព័ត៌មានខ្លីដែលចុះហត្ថលេខាដោយលោក ហូ សិទ្ធី ប្រធានខុទ្ទកាល័យនេះលើកឡើងថា “នៅពេលថ្មីៗនេះ ជនល្មើសបានឆបោកមន្ត្រីខេត្ត និងមន្ត្រីក្រុង ព្រមទាំងកងកម្លាំងប្រដាប់អាវុធតាមរយៈការហៅទូរស័ព្ទ ដោយនិយាយថា ពួកគេធ្វើការនៅខុទ្ទកាល័យរបស់សម្ដេចតេជោនាយករដ្ឋមន្ត្រី”។ “ បន្ទាប់មកពួកគេនិយាយថា ពួកគេអាចដំឡើងតំណែង ឬឋានន្តរស័ក្ដិ ប៉ុន្តែត្រូវការរៀបចំឯកសារ ដូច្នេះហើយពួកគេបានប្រាប់ឲ្យផ្ទេរលុយតាមវីង”។ “ ខុទ្ទកាល័យសូមជូនដំណឹងដល់មន្ត្រីខេត្ត និងក្រុង ព្រមទាំងកងកម្លាំងប្រដាប់អាវុធឲ្យមានការប្រុងប្រយ័ត្នចំពោះទង្វើទុច្ចរិតនេះ។
ប្រសិនបើបងប្អូនទទួលការហៅទូរស័ព្ទពីជនណាដែលអះអាងថា “ជាមន្ត្រីខុទ្ទកាល័យ និងស្នើឲ្យផ្ទេរលុយសម្រាប់កិច្ចការណាមួយនោះ សូមទាក់ទងមកខុទ្ទកាល័យជាមុនសិន”។
លោក អានថូនី ពើគិន នាយកប្រតិបត្តិក្រុមហ៊ុនវីង បានមានប្រសាសន៍ថា លោកមិនបានដឹងអំពីការឆបោកពាក់ព័ន្ធនឹងខុទ្ទកាល័យរបស់លោក ហ៊ុន សែន ទេ ប៉ុន្តែក្រុមហ៊ុនវីងបានចាត់វិធានការប្រុងប្រយ័ត្នជាមុនរួចហើយចំពោះអ្នកឆបោក។ នេះបើយោងតាមការចុះផ្សាយរបស់កាសែតខេមបូឌា ដេលី។
ការឆបោកតាមទូរស័ព្ទពាក់ព័ន្ធនឹងការផ្ទេរលុយមិនមែនជារឿងថ្មីទេនៅក្នុងប្រទេសកម្ពុជា។ កាលពីឆ្នាំមុន បុរសអាយុ៤២ឆ្នាំម្នាក់មកពីខេត្តរតនគិរី បានក្លាយជាជនរងគ្រោះដោយសារគេប្រាប់ឲ្យគាត់ផ្ទេរលុយចំនួន២លានរៀលតាមវីង ដើម្បីទទួលលុយឈ្នះឆ្នោតចំនួន៥.០០០ដុល្លារ។
គួរបញ្ជាក់ផងដែរថា នៅពេលថ្មីៗនេះ កម្មវិធីកំប្លែងរបស់ទូរទស្សន៍ស៊ីធីអិន កាលពីសប្ដាហ៍មុនក៏បានសម្តែងរបៀបជូនដំណឹងដល់ទស្សនិកជនអំពីរបៀបឆបោក ហើយបានបង្ហាញស្ត្រីម្នាក់ដែលស្ទើរតែបានក្លាយជាជនរងគ្រោះដោយសារការឆបោកតាមទូរស័ព្ទ ប៉ុន្តែបានរួចផុតពីការឆបោកនោះវិញ បន្ទាប់ពីប្ដីរបស់គាត់ទាមទារជួបអ្នកហៅទូរស័ព្ទនោះ៕
មតិយោបល់