ភ្នំពេញ៖ រនាំងដែកពុះចែកទ្រូងផ្លូវចំនួន៥ផ្ទាំងត្រូវបានបាក់ នឹងទ្រេតដោយសាររថយន្ត កាមរីហាយប្រ៊ីតពណ៌សមួយគ្រឿងបើកបរដោយបុរសស្រវឹងស្រាជោកជាំម្នាក់បុកកាលពី វេលាម៉ោង២នឹង៤០នាទីរំលងអាធ្រាត្រឈានចូលថ្ងៃទី១៨ខែមិថុនាឆ្នាំ២០១៤តាមបណ្តោយមហាវិថីសហព័ន្ឋរុស្ស៊ីខាងលិចខ្លោងទ្វារវត្តនាគវន្ត័ប្រមាណ១០០ម៉ែត្រស្ថិតក្នុងសង្កាត់ផ្សារដេប៉ូទី៣ខណ្ឌទួលគោក។
នៅកន្លែងកើតហេតុសមត្ថកិច្ចមិនទាន់ស្គាល់អត្តសញ្ញាបុរសស្រវឹងស្រាជោកជាំបើករថយន្តបង្កហេតុនៅឡើយទេ។សាក្សីនៅកន្លែងកើតហេតុបានអោយដឹងថាមុនពេលកើតហេតុមានរថយន្តកាមរីហាយប្រ៊ីតពណ៌សមួយគ្រឿងពាក់ស្លាកលេខភ្នំពេញ 2Z-2688 បើកបរដោយបុរស ស្រវឹងស្រា ជោកជាំ ម្នាក់បានធ្វើដំណើរយ៉ាងលឿនតាមបណ្តោយមហាវិថីសហព័ន្ឋរុស្ស៊ី ក្នុងទិសដៅពីកើតទៅលិចស្រាប់តែមកដល់ចំណុចកើតហេតុខាងលើក៏បានព្យាយាមបើកជែង នឹងរថយន្តមួយគ្រឿងទៀតនៅពីមុខទើបជ្រុលចង្កូតទៅបុករនាំងដែកពុះចែកទ្រូងផ្លូវបាក់អស់ ៥ផ្ទាំង។
ចំណែករថយន្តបង្កហេតុដាច់កងមុខខាងឆ្វេងទៅមុខលែងរួច។ក្រោយពេលកើតហេតុរថយន្ត បង្កហេតុត្រូវបានសមត្ថកិច្ចធ្វើការវាស់វែងស្ទូចយកទៅរក្សាទុកនៅការិយាល័យចរាចរផ្លូវគោកនៃស្នង់ការដ្ឋាននគរបាលរាជធានីភ្នំពេញរងចាំការដោះស្រាយតាមផ្លូវច្បាប់៕
មតិយោបល់