ភ្នំពេញ ៖ បុរសម្នាក់ជិះម៉ូតូមួយគ្រឿងឌុបនារី២នាក់ ខណៈមកដល់ចំណុចផ្លូវកែងស្រាប់តែមាន បុរស២នាក់ជិះម៉ូតូមួយគ្រឿងបត់ឆ្វេងមិនប្រយ័ត្នក៏បុកចំពេញទំហឹងបណ្ដាលអោយដួលរងរបួសធ្ងន់ ហើយភាគីបង្កបានលើម៉ូតូហើយជិះគេចខ្លួនបាត់។ ហេតុការណ៍នេះបានកើតឡើងកាលពីវេលាម៉ោង១១និង៣០នាទីយប់ថ្ងៃទី១៧ខែមិថុនាឆ្នាំ២០១៤ ត្រង់ចំណុចផ្លូវលេខ១៣៦កែងនិងផ្លូវលេខ១៥ ស្ថិតក្នុងសង្កាត់ផ្សារកណ្ដាល១ ខណ្ឌដូនពេញ។
ប្រភពព័ត៌មានពីកន្លែងកើតហេតុបានអោយដឹងថា គេឃើញបុរសម្នាក់ជិះម៉ូតូមួយគ្រឿងម៉ាកហុងដា ស្កូពី ពណ៌ស ពាក់ស្លាកលេខ ភ្នំពេញ 1BQ-0953 ឌុបនារី២នាក់ពីក្រោយធ្វើដំណើរតាមបណ្ដោយ ផ្លូវលេខ១៣៦ក្នុងទិសដៅពីកើតទៅលិច ខណៈមកដល់ចំណុចផ្លូវកែងស្រាប់តែមានម៉ូតូមួយគ្រឿង ម៉ាកគុបជិះដោយបុរស២នាក់មិនចាំស្លាកលេខ ធ្វើដំណើរតាមបណ្ដោយផ្លូវលេខ១៥ ក្នុងទិសដៅ ពីជើងទៅត្បូងក្នុងល្បឿនលឿន ហើយបត់ឆ្វេងឆ្ពោះទៅផ្លូវលេខ១៣៦ ក៏បណ្ដាលអោយ បុកចំម៉ូតូស្កូបពីចំពេញទំហឹងធ្វើអោយម៉ូតូទាំង២គ្រឿងដួលគលើគ្នា ហើយបុរសដែល ជិះម៉ូតូស្កូពីដេកសន្លប់ស្ដូកស្ដឹង ចំណែកទាំងនារី២នាក់គ្រាន់តែរងរបួសស្រាល ចំណែកភាគី ខាងម៉ូតូគុបក៏រងរបួសស្រាល។ ភ្លាមៗក៏មានប្រជាពលរដ្ឋនៅក្បែរកន្លែងកើតហេតុបានទៅដកសោម៉ូតូគុបដើម្បីឃាត់ទុក ប៉ុន្តែ ដោយម៉ូតូគុបសោអ្វីក៏ចាក់ត្រូវធ្វើអោយជនបង្កយកសោមួយផ្សេងទៀតចាក់រួចជិះម៉ូតូគេចខ្លួន ពីចំណុចកើតហេតុបាត់តែម្ដង។
បន្ទាប់ពីកើតហេតុជនរងគ្រោះត្រូវបានរថយន្តសាមុយរបស់មន្ទីរពេទ្យឯកជនដឹកបញ្ជូនទៅសង្គ្រោះភ្លាមៗចំណែកម៉ូតូត្រូវបាននារីរងគ្រោះដែលជិះមកជាមួយជិះទៅតាមរថយន្តសាមុយពីក្រោយ។ ក្នុងហេតុការណ៍នេះគឺគេពុំឃើញមានសមត្ថកិច្ចណាម្នាក់ចុះមកអន្តរាគមន៍នោះទេ៕
មតិយោបល់