ភ្នំពេញ ៖ យ៉ាងហោចណាស់មុស្សម្នាក់បានស្លាប់និង៤នាក់ទៀតរបួសធ្ងន់បន្ទាប់ពីជួបគ្រោះថ្នាក់ចរាចរណ៍ដែលបង្កឡើងដោយរថយន្តម៉ាក RANGE ROVER ស៊េរីទំនើបមួយគ្រឿងបុកម៉ូតូសណ្តោងរទេះដឹកបន្លែ។ហេតុការណ៍នេះកើតឡើងនៅវេលាម៉ោង៣និង១០នាទីទាបភ្លឺ ថ្ងៃទី២២ មិថុនា ២០១៤ នៅចំណុចស្តុបបូកគោ ស្ថិតនៅក្នុងសង្កាត់បឹងត្របែក ខណ្ឌចំការមន។
យោងតាមប្រភពព័ត៌មានពីអ្នកឃើញហេតុការណ៍បានឱ្យដឹងថា នៅមុនពេលកើតហេតុគេបានឃើញរថយន្តម៉ាក RANGE ROVER ស៊េរីទំនើបមួយគ្រឿង ពណ៌ទឹកប្រាក់ ពាក់ស្លាកលេខភ្នំពេញ 2AA-7779 បើកបរដោយបុរសជនជាតិចិនម្នាក់ និងរួមដំណើរដោយបុរសជនជាតិចិនពីរនាក់ទៀត ដោយធ្វើដំណើរលឿនដូចហោះ តាមផ្លូវព្រះមុនីវង្សក្នុងទិសដៅពីជើងទៅត្បូងមកដល់ចំណុចកើតហេតុ ផ្លូវបែកជាបួន( ស្តុបបូកគោ)រថយន្តមិនបានបង្អង់ល្បឿននោះទេ ស្របពេលនោះដែរក៏មានម៉ូតូសណ្តោងរទេះដឹកបន្លែ មួយគ្រឿងជិះគ្នា៥នាក់ មានស្រីមានប្រុស ធ្វើដំណើរតាមផ្លូវព្រះមុនីវង្ស ក្នុងទិសដៅពីត្បូងទៅជើង (បញ្ច្រាសទិសគ្នា)ហើយបានបត់ឆ្លងទៅផ្លូវម៉ៅសេទុង ក៏ត្រូវបានរថយន្តRANGE ROVER ស៊េរីទំនើបមកបុករទេះដឹកបន្លែនោះចំពាក់កណ្តាលពេញទំហឹង បណ្តាលឱ្យរទេះក្រឡាប់ពីរបីត្រឡប់ បោកស្ត្រីម្នាក់ខ្ទាតចេញពីក្នុងរទេះស្លាប់នៅនិងកើតហេតុ ហើយមនុស្សប្រុស-ស្រី៤នាក់ទៀតរងរបួសធ្ងន់ ។ ប្រជាពលរដ្ឋដែលឃើញហេតុការបាននាំគ្នាវាយបុរសជនជាតិចិនដែលបើករថយន្តបង្កឱ្យរងរបួសផងដែរ ដោយសារតែពួកគាត់ខឹងនិងបុរសម្នាក់នេះបើករថយន្តលឿនដូចហោះ និងបុកមនុស្ស ស្លាប់យ៉ាងអាណោចអាធ័ម ។
ក្រោយពេលកើតហេតុជនរងគ្រោះរបួសធ្ងន់ត្រូវបានគេបញ្ជូនទៅសង្គ្រោះបន្ទាន់នៅមន្ទីរពេទ្យ ចំណែករថយន្តបង្ក និងម៉ូតូ ត្រូវបានសមត្ថកិច្ចមូលដ្ឋាន សហការជាមួយនគរបាលចរាចរជើងគោកធ្វើការវាស់វែងនិងយកទៅរក្សាទុកនៅការិយាល័យចរាចរជើងគោក នៃស្នងការនគរបាលរាជធានីភ្នំពេញដើម្បីដោះស្រាយគ្នាតាមនិវិធីច្បាប់ ។
គួរបញ្ជាក់ផងដែរថា ប្រជាពលរដ្ឋបានសំណូមពរដល់សមត្ថកិច្ចឱ្យមានចំណាត់ការដាក់ទោសចំពោះជនដែលបើករថយន្តបង្កឱ្យមានគ្រោះថ្នាក់ចរាចរហូតដល់ស្លាប់បាត់បង់ជីវិតដើម្បីរកយុត្តិធម៌ជូនជនរងគ្រោះ និងកុំឱ្យជនជនបង្កទាំងនោះអាងលុយកាក់រំដោះខ្លួនចេញពីសំណាញ់ច្បាប់៕
មតិយោបល់