ភ្នំពេញ ៖ បុរស៣នាក់ជិះម៉ូតូមួយគ្រឿងក្នុងស្ថានភាពស្រវឹងគេចម៉ូតូសណ្ដោងរទេះដឹកបន្លែមិនផុតជ្រុលបុកជំហៀងខាងក្រោយរទេះដឹកបន្លែបណ្ដាលអោយដួលរងរបួសធ្ងន់ស្រាល។ ហេតុការណ៍គ្រោះថ្នាក់ចរាចរនេះបានកើតឡើងកាលពីវេលាម៉ោង២និង០៥នាទីរំលងអាធ្រាត្រឈានចូលថ្ងៃទី២៣ខែមិថុនាឆ្នាំ២០១៤ ត្រង់ចំណុចស្ដុបបូកគោ តាមបណ្ដោយផ្លូវព្រះមុនីវង្សកែងផ្លូវម៉ៅសេទុង ស្ថិតក្នុងសង្កាត់បឹងត្របែក ខណ្ឌចំការមន។
បើតាមសម្ដីរបស់ជនរងគ្រោះបានអោយដឹងថា នៅមុនពេលកើតហេតុរូបគេនិងមិត្តភ័ក្តិបានទៅផឹកស៊ីនៅហាងមួយកន្លែងនៅម្ដុំបឹងក្រពើ ពេលផឹកស៊ីរួចរាល់ក៏ជិះម៉ូតូហុងដាឌ្រីម ពណ៌ខ្មៅ អត់មានស្លាកលេខ ចេញមកវិញបំណងត្រឡប់ទៅផ្ទះ ធ្វើដំណើរតាមបណ្ដោយផ្លូវព្រះមុនីវង្ស ទិសដៅពីត្បូងទៅជើង ខណៈមកដល់ចំណុចស្ដុបបូកគោ ស្រាប់តែមានម៉ូតូសណ្ដោងរទេះដឹកបន្លែមួយគ្រឿងជិះធ្វើដំណើរតាមបណ្ដោយផ្លូវម៉ៅសេទុងទិសដៅពីកើតទៅលិចឆ្លងផ្លូវ ធ្វើអោយម៉ូតូជនរងគ្រោះវ៉ាក់គេចមិនផុតក៏ជ្រុលបុកកន្ទុយរទេះដឹកបន្លែបណ្ដាលអោយដួលរងរបួសធ្ងន់ម្នាក់ស្រាល២នាក់និងម៉ូតូខ្ទេចមួយកំណាត់មុខ ចំណែកម៉ូតូសណ្ដោងរទេះដឹកបន្លែមិនមានបញ្ហាអ្វីក៏បានជិះគេចខ្លួនបាត់ពីកន្លែងកើតហេតុ។
ក្រោយពេលកើតហេតុសមត្ថកិច្ចមូលដ្ឋានបានចុះទៅអន្តរាគមន៍និងបញ្ជូនជនរងគ្រោះដែលរងរបួសធ្ងន់ទៅសង្គ្រោះនៅមន្ទីរពេទ្យភ្លាមៗ ចំណែកជនរងគ្រោះរងរបួសស្រាលបានលើកម៉ូតូដាក់ក្បែរចិញ្ចើមផ្លូវយកទៅជួសជុលដោយខ្លួនឯង៕
មតិយោបល់