ភ្នំពេញ៖ សាលារាជធានីភ្នំពេញ បានកំណត់យកតំបន់ភ្លើងស្ដុបចំនួន ០៦កន្លែង ដើម្បីលប់បំបាត់ជនអនាថា អ្នកសុំទាន និងអ្នកលក់ផ្កា ធ្វើជាគំរូកុំឲ្យប៉ះពាល់ដល់សណ្តាប់ធ្នាប់សាធារណៈ និងប៉ះពាល់ដល់អ្នកធ្វើដំណើរទូទៅដែលឆ្លងកាត់។
នៅព្រឹក ថ្ងៃទី២០ ខែ មិថុនា ឆ្នាំ ២០១៤ នេះ សាលារាជធានីភ្នំពេញ មានផែនការយកតំបន់ភ្លើងស្តុបចំនួន ០៦ កន្លែងធ្វើជាគំរូគ្មានកុមារអនាថា និងអ្នកសុំទាន ឬអ្នកលក់ផ្កា ដើម្បីកុំឲ្យមានផលប៉ះពាល់ដល់សណ្តាប់ធ្នាប់សាធារណៈ និងប៉ះពាល់ដល់អ្នកធ្វើដំណើរទូទៅដែលឆ្លងកាត់ តាមភ្លើងស្តុបទាំងនោះ ដោយកិច្ចប្រជុំនេះត្រូវបានដឹកនាំដោយ លោកជំទាវ ម៉ក់ វណ្ណស៊ីថា អភិបាលរងរាជធានីភ្នំពេញ គោលបំណងដោះ ស្រាយបញ្ហាជនអនាថា និងកុមារអនាថា នៅក្នុងរាជធានីភ្នំពេញ។
លោកជំទាវ អភិបាលរងរាជធានីភ្នំពេញ បានបញ្ជាក់ថា ចាប់ពីពេលនេះទៅ សាលារាជធានីភ្នំពេញ នឹងបញ្ចប់សកម្មភាពកុមារអនាថា ជនអនាថា ដែលដើរសុំទាន ឬដើរលក់ផ្កា តាមចំណុចភ្លើងស្តុបសំខាន់ៗចំនួន ០៦កន្លែង ដើម្បីធ្វើជាគំរូសម្រាប់ឈានទៅអនុវត្តន៍នៅចំណុចភ្លើងស្តុបផ្សេងៗទៀត ។ ចំណុចភ្លើងស្តុបទាំង០៦កន្លែងនោះ រួមមាន៖ ស្តុបកាណាឌីយ៉ា ស្តុបទួលគោក ស្តុបអាងទឹកអូឡាំពិក ស្តុបបូកគោ ស្តុបពេទ្យចិន និងស្តុបផ្សារដើមគរ ។
តាមស្ថិតិរបស់មន្ទីរសង្គមកិច្ច អតីតយុទ្ធជន និងយុវនិតិសម្បទារាជធានីភ្នំពេញ បានឲ្យដឹងថា ចាប់ពីដើមខែ មករា ដល់ខែ មិថុនា ឆ្នាំ២០១៤នេះ មន្ទីរបានប្រមូលជនអនាថាយកទៅអប់រំ និងផ្តល់ជំនាញវិជ្ជាជីវៈបានចំនួន ២៣៩នាក់ ។ បើតាមការប៉ាន់ស្មាន បច្ចុប្បន្ននៅមានជនអនាថា និងអ្នកសុំទានប្រមាណជាង ១០០នាក់ទៀត ដែល កំពុងធ្វើសកម្មភាព តាមស្តុបនានាក្នុងរាជធានីភ្នំពេញ៕
មតិយោបល់