ភ្នំពេញ ៖ ម៉ូតូមួយគ្រឿងដែលបើកទៅបុកចំហៀងខាងឆ្វេងផ្នែកខាងក្រោយរថយន្តបណ្តាលឱ្យបុរសអ្នកបើកម៉ូតូសន្លប់ធំ ចំណែករថយន្តរេចង្កូតផុងកង់ម្ខាងចូលទៅក្នុងលូ ។ ហេតុការណ៍នេះកើតឡើងកាលពីវេលាម៉ោង ៩និង៣០នាទីយប់ថ្ងៃទី ២៣ មិថុនា ២០១៤ នៅចំណុចមុខសកលវិទ្យាល័យការពារជាតិ តាមផ្លូវបេតុង ស្ថិតក្នុងសង្កាត់ឬស្សីកែវ ខណ្ឌឬស្សីកែវ ។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេឃើញរថយន្តម៉ាកឡិចស៊ីស ៤៧០ ពណ៌ខ្មៅ មួយគ្រឿង ពាក់ស្លាកលេខភ្នំពេញ 2I-8795 ធ្វើដំណើរតាមផ្លូវបេតុងក្នុងទិសដៅពីលិចទៅកើត មកដល់ចំណុចកើតហេតុក៏ត្រូវបានម៉ូតូវ៉េវអាល់ហ្វាមួយគ្រឿង ពណ៌ខ្មៅ ពាក់ស្លាកលេខភ្នំពេញ 1O-9775 បើកដោយបុរសម្នាក់តាមផ្លូវបេតុងពីកើតទៅលិច(បញ្ច្រាសទិសគ្នា ) មកបុកចំចំហៀងខាងឆ្វេងផ្នែកខាងមុខរថយន្តបណ្តាលឲ្យ អ្នកបើកម៉ូតូសន្លប់ធំនៅនិងកន្លែង ចំណែករថយន្តក៏រេចង្កូតជ្រុលកង់ម្ខាងចូលទៅក្នុងប្រឡាយ លូជាប់ទៅមុខលែងរួច។ ប្រភពបានឱ្យដឹងទៀតថា ប្រហែលជាអ្នកជិះម៉ូតូខាងលើ ស្រវឹងស្រាជោកជាំ ក៏ជិះម៉ូតូរេចង្កួតទៅបុករថយន្តហើយក៏ធ្វើឲ្យអ្នកបើករថយន្តទាញចង្កូតគេចក៏ធ្វើឲ្យរថយន្តជ្រុលធ្លាក់ចូលលូតែម្តង ។
ក្រោយពេលកើតហេតុសមត្ថកិច្ចមូលដ្ឋានបានចុះមកពិនិត្យនិងបានប្រគល់រឿងនេះទៅឱ្យនគរបាលចរាចរក្រុង ស្ទូចយករថយន្តនិងម៉ូតូទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីរងចាំធ្វើការដោះស្រាយគ្នាទៅផ្លូវច្បាប់៕
មតិយោបល់