ភ្នំពេញៈ នៅថ្ងៃទី០៧ ខែសីហា ឆ្នាំ២០២១ វេលាម៉ោង១១និង៣០នាទីព្រឹក មានករណីជនសង្ស័យចំនួន០២នាក់ បានធ្វើសកម្មភាព លួចម៉ូតូមួយគ្រឿង ត្រូវបានកម្លាំងសមត្ថកិច្ចល្បាតឃាត់ខ្លួនម្នាក់ ត្រង់ចំណុចគល់ស្ពានព្រែកជ្រៃ ស្ថិតតាមបណ្តោយផ្លូវលេខ២១៧ ក្នុងភូមិព្រែកជ្រៃ សង្កាត់ស្ពានថ្ម ខណ្ឌដង្កោ រាជធានីភ្នំពេញ ។

ដំណើររឿងហេតុ៖ នៅមុនពេលកើតហេតុ ជនរងគ្រោះខាងលើ បានទុកម៉ូតូមួយគ្រឿងនៅខាងមុខផ្ទះរបស់ខ្លួន ដោយបានចាក់សោក ត្រឹមត្រូវ ហើយជនរងគ្រោះបានដើរទៅក្នុងផ្ទះលក់ដូរ ពេលនោះស្រាប់តែលេចមុខ ជនសង្ស័យចំនួន០២នាក់ ជិះម៉ូតូម៉ាកហុងដា ឌ្រីមសង់ សេ១២៥ ពណ៌ខ្មៅ ស៊េរីឆ្នាំ២០១០ ពាក់ស្លាកលេខភ្នំពេញ 1AB-5873 ឈប់នៅត្រង់ចំណុចកើតហេតុ បន្ទាប់មកជនសង្ស័យ ឈ្មោះម្នាក់ បានចុះពីលើម៉ូតូដើរតម្រង់ទៅធ្វើសកម្មភាព កាច់សោកម៉ូតូជនរងគ្រោះ អូសចេញផុតមុខផ្ទះ បានបញ្ឆេះជិះគេចខ្លួនត្រូវបានម្ចាស់ឃើញទាន់ក៏ស្រែក និងរត់ដេញតាមពីក្រោយជនសង្ស័យ និងបានជួបអ្នកដំណើរតាមផ្លូវ គេឃើញជួយឌុបម្ចាស់ម៉ូតូដេញតាមពីក្រោយ ហើយស្រែកដថាចោរៗ ខណៈនោះកម្លាំងល្បាត ខណ្ឌដង្កោកំពុងជិះម៉ូតូតាមផ្លូវ ឃើញក៏ជួយអន្តរាគមន៍ជិះដេញតាមជនសង្ស័យខាងលើ ហើយបានឃាត់ខ្លួនម្នាក់ឈ្មោះ ខុម ចិន្តា ត្រង់ចំណុចរង្វង់មូលកួរស្រូវ ស្ថិតក្នុងភូមិកណ្តាល សង្កាត់រលួស ខណ្ឌដង្កោ រាជធានីភ្នំពេញ ។

ក្រោយពេលកើតហេតុ ជនសង្ស័យខាងលើ ត្រូវបានកម្លាំងសមត្ថកិច្ចឃាត់ខ្លួនកសាងសំណុំរឿង ដើម្បីចាត់ការបន្តតាមនីតិវិធីផ្លូវច្បាប់ ។ ចំណែកបក្ខពួកម្នាក់ទៀត ដែលរត់គេចខ្លួនបាត់ស្រមោលនោះ សមត្ថកិច្ចកំពុងតែស្រាវជ្រាវស្វែងរកចាប់ខ្លួន យកមកផ្តន្ទាទោសតាមផ្លូវច្បាប់ ៕