ភ្នំពេញ៖ នៅថ្ងៃទី២៣ខែមិថុនា ឆ្នាំ ២០១៤ ម្សិលមិញនេះ នាយកប្រតិបត្តិក្រុមហ៊ុនទូរស័ព្ទចល័ត qb និង Smart បានជួបជាមួយក្រុមមន្ត្រីមកពីបញ្ញត្តិករទូរគមនាគមន៍កម្ពុជា (TRC) ក្នុងកិច្ចប្រឹងប្រែងដើម្បីដោះស្រាយជម្លោះកំពុងកើតមានរបស់ក្រុមហ៊ុនទាំងពីរ ប៉ុន្តែមិនបានឈានដល់កិច្ចព្រមព្រៀងទេ។ នេះបើយោងតាមការចុះផ្សាយរបស់កាសែត ខេមបូឌា ដេលី។
កិច្ចប្រជុំត្រូវបានធ្វើឡើងអស់រយៈពេលប្រមាណជា ១ម៉ោង នៅការិយាល័យរបស់ TRC ដែលមានការចូលរួមពី លោក អាឡាន ស៊ីនហ្វៀល នាយកប្រតិបត្តិក្រុមហ៊ុនទូរស័ព្ទចល័ត qb និងលោក ថូម៉ាស ហាន នាយកប្រតិបត្តិក្រុមហ៊ុនទូរស័ព្ទចល័ត Smart បានជួបជាមួយលោក អ៊ុក ដូរ៉ានី ជាមន្ត្រីទី២នៃ TRC ព្រមទាំងមន្ត្រីជាច្រើនរូបផ្សេងទៀត។
ក្រោយពីកិច្ចប្រជុំចប់ នាយកប្រតិបត្តិមកពីក្រុមហ៊ុនទូរគមនាគមន៍ទាំងពីរបានបដិសេធមិនធ្វើអត្ថាធិប្បាយអ្វីទាំងអស់ ប៉ុន្តែក្រុមហ៊ុន qb កំពុងគំរាមប្ដឹងក្រុមហ៊ុន Smart ទៅតុលាការជុំវិញការចោទប្រកាន់ទាំងនោះ ប៉ុន្តែក្រុមមន្ត្រី TRC បាននិយាយថា ពួកគេចង់ដោះស្រាយបញ្ហានេះនៅក្រៅតុលាការ។
គួរបញ្ជាក់ផងដែរថា ក្រុមហ៊ុន qb បានចោទប្រកាន់ក្រុមហ៊ុន Smart ថាបានអូសទាញអតិថិជន និងបានបង្ខូចកេរ្តិ៍របស់ខ្លួន នៅមិនពេលកិច្ចព្រមព្រៀងបញ្ចប់ការប្រើប្រាស់សេវកម្ម រ៉ូមីងរវាងក្រុមហ៊ុនទាំងពីរ៕
មតិយោបល់