ភ្នំពេញ ៖ រថយន្ត២គ្រឿងបុកពន្លះគ្នាចំកណ្ដាលទ្រូងផ្លូវរងការខូចខាតទាំងសងខាង សំណាងគ្មានមនុស្សរងរបួស ហេតុការណ៍គ្រោះថ្នាក់ចរាចរនេះបានកើតឡើងកាលពីវេលាម៉ោង១និង៣០នាទីរំលងអាធ្រាត្រឈានចូលថ្ងៃទី៤ខែកក្កដាឆ្នាំ២០១៤ ត្រង់ចំណុចក្បែរអាកាសយានដ្ឋានអន្តរជាតិភ្នំពេញប្រមាណ២០០ម៉ែត្រ ស្ថិតក្នុងភូមិក្បាលដំរី សង្កាត់កាកាប ខណ្ឌពោធិ៍សែនជ័យ។
ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុគេឃើញរថយន្ត មួយគ្រឿងម៉ាក ហ៊ីយ៉ន់ដាយ អាកតូស ពណ៌ស ពាក់ស្លាកលេខ ភ្នំពេញ 2Y-6720 បើកបរ ដោយបុរសម្នាក់រួមដំណើរនិងនារីម្នាក់ ធ្វើដំណើរតាមបណ្ដោយផ្លូវសហព័ន្ធរុស្ស៊ី ទិសដៅ ពីលិចទៅកើតបញ្ច្រាស់ផ្លូវហើយបានបត់ស្ដាំឆ្លងផ្លូវ ស្រាប់តែមានរថយន្តមួយគ្រឿងម៉ាកតូយ៉ូតា ហាយឡែនឌ័រ ពណ៌ឈាមជ្រូក ពាក់ស្លាកលេខ កណ្ដាល 2A-9339 ជិះដោយបុរសម្នាក់និងនារីម្នាក់ ធ្វើដំណើរតាមបណ្ដោយផ្លូវសហព័ន្ធរុស្ស៊ី ក្នុងល្បឿនលឿន ទិសដៅពីកើតទៅលិច ក៏បានបុកប៉ះ គ្នាចំកណ្ដាលទ្រូងផ្លូវរងការខូចខាតទាំងសងខាង សំណាងភាគីទាំងសងខាងមិនមានរងរបួស។
បន្ទាប់ពីកើតហេតុសមត្ថកិច្ចមូលដ្ឋានបានចុះមកអន្តរាគមន៍ភ្លាមៗ ហើយភាគីទាំងសងខាងបានធ្វើការសម្របសម្រួលគ្នា ដោយភាគីរថយន្តអាកតូសព្រោះសងសំណងយករថយន្តហាយឡែនឌ័រទៅជួសជុលដើម្បីបញ្ចប់រឿង៕
ទស្សនាឃ្លិបដូចខាងក្រោមនេះ៖
មតិយោបល់