ភ្នំពេញ ៖ បុរស៣នាក់ជិះម៉ូតូមួយគ្រឿងចេញពីកន្លែងញ៉ាំអីត្រឡប់ទៅផ្ទះត្រូវរថយន្តមួយគ្រឿងបុកចំពីក្រោយប៉ើងរងរបួសធ្ងន់២នាក់ស្រាលម្នាក់ ហេតុការណ៍នេះបានកើតឡើងកាលពីវេលាម៉ោង១០និង៥៥នាទីយប់ថ្ងៃទី១៤ខែកក្កដាឆ្នាំ២០១៤ ត្រង់ចំណុចមុខអាគារពាណិជ្ជកម្មអែតវ៉ូត តាមបណ្ដោយផ្លូវសហព័ន្ធរុស្ស៊ី ស្ថិតក្នុងសង្កាត់ទឹកថ្លា ខណ្ឌសែនសុខ។
ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុគេឃើញបុរស៣នាក់ជិះម៉ូតូ១គ្រឿងម៉ាកហុងឌ្រីម ធុនសេ១២៥ ពណ៌ខ្មៅ ពាក់ស្លាកលេខ ភ្នំពេញ 1R-7105 ធ្វើដំណើរតាមបណ្ដោយផ្លូវសហព័ន្ធរុស្ស៊ី ទិសដៅពីកើតទៅលិច ស្រាប់តែមកដល់ចំណុចកើតមានរថយន្តមួយគ្រឿងមិនចាំម៉ាកបានបើកយ៉ាងលឿនធ្វើដំណើរស្របទិសគ្នាពីក្រោយក៏បុកម៉ូតូចំពេញទំហឹងប៉ើងជាង១០ម៉ែត្របណ្ដាអោយបុរស២នាក់រងរបួសធ្ងន់ និងម្នាក់ទៀតរងរបួសស្រាលសន្លប់ស្ដូកស្ដឹង។ បន្ទាប់ពីកើតហេតុរថយន្តបង្កបានបើករត់គេចបាត់ ហើយរថយន្តសាមុយរបស់មន្ទីរពេទ្យឯកជនក៏បានដឹកជនរងគ្រោះទៅមន្ទីរពេទ្យភ្លាមៗផងដែរ។
បើតាមសម្ដីបុរសឈ្មោះ ខេមរ៉ា អាយុប្រហែល៣០ឆ្នាំដែលរងរបួសស្រាលក្រោយពេលងើបពីសន្លប់បានអោយដឹងថា គ្នារបស់គាត់២នាក់ដែលរងរបួសធ្ងន់ ម្នាក់ឈ្មោះ ហង្ស សាវិន អាយុ២៨ឆ្នាំមុខរបរជាអ្នកបើកបររថយន្ត និងម្នាក់ទៀតឈ្មោះ សុខ សីហា អាយុ២៥ឆ្នាំមុខរបរជាងជួសជុលគ្រឿងម៉ាស៊ីន ពួកគាត់ទាំង៣នាក់មានទីលំនៅសង្កាត់ក្រាំងធ្នុង ខណ្ឌសែនសុខ មុនពេលកើតហេតុពួកគាត់ទាំង៣នាក់បានជិះម៉ូតូទៅញ៉ាំអីនៅម្ដុំសន្ធរម៉ុក លុះពេលញ៉ាំរួចក៏ជិះម៉ូតូបំណងត្រឡប់ទៅផ្ទះវិញ ស្រាប់មកដល់ចំណុចកើតហេតុក៏ជួបគ្រោះថ្នាក់តែម្ដង។
ក្រោយពេលកើតហេតុសមត្ថកិច្ចបានចុះមកអន្តរាគមន៍ធ្វើការវាស់វែងយកម៉ូតូទៅរក្សាទុក ហើយកំពុងស្វែងរករថយន្តបង្កដើម្បីធ្វើការដោះស្រាយតាមផ្លូវច្បាប់៕
មតិយោបល់