ភ្នំពេញ ៖ បុរសម្នាក់ជិះម៉ូតូមួយគ្រឿងក្នុងល្បឿនលឿនគេចជង្ហុកក៏ជ្រុលទៅបុកម៉ូតូមួយគ្រឿងទៀតទិសដៅបញ្ច្រាស់គ្នាជិះដោយបុរសម្នាក់និងនារី២នាក់ ចំពេញទំហឹងបណ្ដាលអោយដួលរងរបួសធ្ងន់ស្រាល៤នាក់ ហេតុការណ៍នេះបានកើតឡើងកាលពីវេលាម៉ោង១និង២០នាទីរំលងអាធ្រាត្រឈានចូលថ្ងៃទី១៧ខែកក្កដាឆ្នាំ២០១៤ ត្រង់ចំណុចមុខភោជនីយដ្ឋាន រស្មីពោធិ៍ចិនតុង តាមបណ្ដោយផ្លូវលេខ២០១៤ ស្ថិតក្នុងសង្កាត់កាកាប ខណ្ឌពោធិ៍សែនជ័យ។
ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុមានម៉ូតូមួយគ្រឿងម៉ាកស៊ុយស៊ូគី និក ពណ៌ខ្មៅសលាយក្រហម ពាក់ស្លាកលេខ ភ្នំពេញ 1CF-0584 ជិះដោយបុរសម្នាក់និងនារី២នាក់ ធ្វើដំណើរតាមបណ្ដោយផ្លូវលេខ២០០៤ ទិសដៅពីលិចទៅកើត ស្រាប់តែមកដល់ចំណុចកើតហេតុក៏មានម៉ូតូមួយគ្រឿងម៉ាកគុបជ្រុង ពណ៌ទឹកប៊ិច ពាក់ស្លាកលេខ ភ្នំពេញ 1G-1932 ជិះដោយបុរសម្នាក់ក្នុងល្បឿនលឿនហើយគេចជង្ហុកក៏ជ្រុលចង្កូតបុកម៉ូតូនិកចំពេញទំហឹងបណ្ដាលបុរសជិះម៉ូតូគុបដួលបោកនិងថ្នល់សន្លប់ស្ដូកស្ដឹង ចំណែកភាគីខាងម៉ូតូនិករងរបួសរលត់ដៃរលត់ជើងដាច់មុខមាត់។
បន្ទាប់ពីកើតហេតុជនរងគ្រោះត្រូវបានរថយន្តសាមុយដឹកបញ្ជូនទៅមន្ទីរពេទ្យភ្លាមៗចំណែកអ្នករងរបួសស្រាលត្រូវមិត្តភ័ក្តមកដឹកយកមន្ទីរពេទ្យដើម្បីលាងរបួសផងដែរ ហើយម៉ូតូទាំង២គ្រឿងសមត្ថកិច្ចបានយកទៅរក្សាទុកនៅប៉ុស្ដិ៍នគរបាលកាកាបរង់ចាំធ្វើការដោះស្រាយតាមនីតិវិធីច្បាប់៕
មតិយោបល់