ការប្រឡងសញ្ញាបត្រមធ្យមសិក្សាទុតិយភូមិចំណេះទូទៅ និងបំពេញវិជ្ជា ដែលសម័យប្រឡងនឹងប្រព្រឹត្តទៅនៅថ្ងៃទី៤ ខែសីហា ឆ្នាំ២០១៤ មានថ្នាក់វិទ្យាសាស្ត្រ និងវិទ្យាសាស្ត្រសង្គម ដែលមានបេក្ខជនសរុប៩៣ ៤៥៦ នាក់ ព្រមទាំងមានមណ្ឌលប្រឡងចំនួន១៥៤មណ្ឌល និងចែកចេញជា៣ ៧៧៩ បន្ទប់ នៅរាជធានី-ខេត្តទូទាំងប្រទេស នៃព្រះរាជាណាចក្រកម្ពុជា។
សេចក្ដីប្រកាសព័ត៌មានរបស់ក្រសួងអប់រំ យុវជន និងកីឡា ចុះថ្ងៃទី១៨ ខែកក្កដាឆ្នាំ២០១៤ បានឲ្យដឹងផងដែរថា ការប្រឡងនេះនឹងត្រូវប្រកាសលទ្ធផលនៅតាមមណ្ឌលប្រឡងនីមួយៗ នៅរសៀលថ្ងៃទី២៩ ខែសីហា ឆ្នាំ២០១៤ សម្រាប់មណ្ឌលប្រឡងនៅរាជធានីភ្នំពេញ និងខេត្តកណ្ដាល និងនៅថ្ងៃទី៣០ ខែសីហា ឆ្នាំ២០១៤ សម្រាប់មណ្ឌលប្រឡងនៅខេត្តផ្សេងៗទៀត។
សេចក្ដីប្រកាសព័ត៌មានបានឲ្យដឹងទៀថា ដើម្បីឲ្យដំណើរការប្រឡងប្រព្រឹត្តទៅតាម គោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាននោះ ក្រសួងអប់រំ យុវជន និងកីឡាសូមអំពាវនាវដល់បេក្ខជនទាំងអស់ ត្រូវគោរពបទបញ្ញត្តិនៃការប្រឡងឲ្យបានល្អ ប្រសើរ ជាពិសេសមិនត្រូវលាក់ទុកជាប់នឹងខ្លួននូវឧបករណ៍អេឡិចត្រូនិចគ្រប់ប្រភេទចូលក្នុងមណ្ឌលប្រឡង ឬបន្ទប់ប្រឡងជាដាច់ខាត។ ក្នុងករណីរកឃើញឧករណ៍ដែលហាមឃាត់ ត្រូវចាត់ទុកថា បានប្រព្រឹត្តសកម្មភាពផ្ទុយនឹងបទបញ្ញត្តិ និងកម្រិតវិន័យចំពោះបេក្ខជន នឹងបានកំណត់ឲ្យធ្លាក់ជាស្វ័យប្រវត្តិ។ មាតា បិតា ឬអាណាព្យាបាលបេក្ខជន និងសាធារណជនអាចទទួលបានព័ត៌មានថ្មីៗ ឬសាកសួរ និងបញ្ចេញយោបល់ពាក់ព័ន្ធនឹងដំណើរការប្រឡងនេះ តាមបណ្ដាញទំនាក់ទំនងសង្គមផ្លូវការរបស់ក្រសួងអប់រំ យុវជន និងកីឡាក៏បាន៕
មតិយោបល់