ភ្នំពេញ ៖ យ៉ាងហោចណាស់មនុស្ស៣នាក់បានស្លាប់បាត់បង់ជីវិតនៅនឹងកន្លែងកើតហេតុយ៉ាងអានោចអាធ័ម បន្ទាប់ពីជួបគ្រោះថ្នាក់ចរាចរណ៍មួយដែលបង្កឡើងរវាងរថយន្តតាកូម៉ាពណ៌ទឹកប្រាក់មួយគ្រឿងបើកបរដោយបុរសម្នាក់បានបើកបុកម៉ូតូវ៉េវអាល់ហ្វាពណ៌ខ្មៅមួយគ្រឿងជិះដោយបុរស៣នាក់ចំពីមុខពេញទំហឹង កាលពីវេលាម៉ោង ១០ និង ៤០នាទីយប់ ថ្ងៃទី ២០ កក្កដា ២០១៤នៅចំណុចមុខអាកាសយានដ្ឋានភ្នំពេញអន្តរជាតិភ្នំពេញ តាមបណ្តោយមហាវិថី សហព័ន្ធរុស្ស៊ី ស្ថិតនៅក្នុងភូមិក្បាលដំរី សង្កាត់កាកាប ខណ្ឌពោធិ៍សែនជ័យ ។
នៅកន្លែងកើតហេតុសមត្ថកិច្ចមិនទាន់ស្គាល់អត្តសញ្ញាណជនរងគ្រោះទាំង៣នាក់នៅឡើយទេគ្រាន់តែដឹងថាជនរងគ្រោះទាំង៣នាក់មានស្រុកកំណើតនៅខេត្តកំពង់ស្ពឺប៉ុណ្ណោះ។
យោងតាមប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេបានឃើញ ម៉ូតូវ៉េវ ពណ៌ខ្មៅ មួយគ្រឿង ពាក់ស្លាកលេខ កំពង់ស្ពឺ 1A-7453 ដែលជិះដោយបុរស៣នាក់ តាមមហាវិថីសហព័ន្ធរុស្ស៊ី ក្នុងទិសដៅ ពីកើតទៅលិច ក្នុងល្បឿនយ៉ាងលឿនមកដល់ចំណុចកើតហេតុ ម៉ូតូក៏បានបើកវ៉ា រថយន្តមួយគ្រឿងទៀតដែលបើកស្របទិសគ្នានៅពីមុខទើប ជ្រុលទៅបុករថយន្តតាកូម៉ា ពណ៌ស្ករ មួយគ្រឿង ពាក់ស្លាកលេខភ្នំពេញ 2Y-9037 បើកបរដោយបុរសស្រវឹងស្រាជោកជាំម្នាក់ដែលធ្វើដំណើរ (បញ្ច្រាសទិសគ្នា)ចំពីមុខ ពេញទំហឹង បណ្តាលឱ្យអ្នកបើកម៉ូតូ នឹងម៉ូតូកៀបជាប់ពីក្រោមរថយន្ត ហើយត្រួវរថយន្តអូសជាង១០ ម៉ែត្រស្លាប់នៅនឹងកន្លែងកើតហេតុភ្លាម់ៗ ចំណែកអ្នករួមដំណើរ២នាក់ទៀតបានផ្លោងខ្ទាតទៅបោកនឹងថ្នល់បាក់ក ស្លាប់មួយរំពេចផងដែរ ។
ឃើញដូចនោះបុរសស្រវឹងស្រាជោកជាំបើករថយន្តតាកូម៉ាបង្កហេតុខាងលើបានបើកទ្វារចុះពីលើរថយន្តបំរុងរត់គេចតែត្រូវប្រជាពលរដ្ឋដែលឃើញហេតុការណ៍នោះនាំគ្នាឡោមព័ន្ឋចាប់វាយម្នាក់១ដៃ១ជើងស្ទើរស្លាប់កុំតែបានសមត្ថកិច្ចខណ្ឌពោធិសែនជ័យធ្វើការអត្តរាគមន៍ហើយធ្វើការរំដោះចេញពីកន្លែងកើតហេតុយកទៅសាកសួរនៅប៉ុស្តិ៍នគរបាលរដ្ឋបាលកាកាប់ទាន់កុំអីប្រហែលជាត្រូវប្រជាពលរដ្ឋវាយស្លាប់ទៅតាមជនរងគ្រោះទាំង៣នាក់ដែលហើយមើលទៅ។
ក្រោយពេលកើតហេតុសមត្ថកិច្ចកំពង់ធ្វើការវាស់វែងយករថយន្តនិងម៉ូតូទៅកាន់ការិយាល័យចរាចរ នៃស្នងការដ្ឋាននគរបាលរាជធានីដើម្បីធ្វើការដោះស្រាយតាមផ្លូវច្បាប់ ស្រាប់តែមានរថយន្តឡិចស៊ីស RX300 ពណ៌ស មួយគ្រឿងបើកបរដោយបុរសជនជាតិចិនម្នាក់បានឈប់រថយន្តនៅកណ្តាលផ្លូវដើម្បីមើលហេតុការណ៍គ្រោះថ្នាក់ខាងលើនោះក៏មានយុវជនស្រវឹងស្រាជោកជាំម្នាក់បើកម៉ូតូឌ្រីមសេ១២៥ ពណ៌ខ្មៅមួយគ្រឿងក្នុងល្បឿនលឿនទៅបុកគូទរថយន្តឡិចស៊ីស RX 300 ពណ៌សនោះចំពីក្រោយពេញទំហឹងបណ្តាលឲ្យរងរបួសធ្ងន់ម្នាក់ទៀតទៅ។ ចំណែកសពជនរងគ្រោះទាំង៣នាក់ ត្រូវបានសមត្ថកិច្ចយកទៅតម្កល់ទុក្ខនៅក្នុងវត្តពោធិចិនតុង រងចាំក្រុមគ្រួសារមកទទួលយកទៅធ្វើបុណ្យតាមប្រពៃណី។
មតិយោបល់