វគ្គគ្រូបង្វឹកកីឡាទ្រីយ៉ាត្លុងដែលជាកីឡាមួយប្រភេទរួមបញ្ចូលគ្នានូវវិញ្ញាសាចំនួន៣បញ្ចូលគ្នានោះបានបើកជាលើកដំបូងនៅកម្ពុជាកាលពីព្រឹកថ្ងៃទី២០កក្កដា នាទីស្នាក់ការគណ:កម្មាធិការជាតិអូឡាំពិកកម្ពុជា ។
វគ្គសិក្សានេះទទួលបានការឧបត្ថម្ភពីអង្គការសាមគ្គីអូឡាំពិក(Olympic Sodarity) បង្ហាត់ដោយគ្រូមកពីអាហ្វ្រិកខាងត្បូងគឺ លោក STUDER FRANZ មានរយៈពេល១០ថ្ងៃ។
ក្នុងវគ្គសិក្សានេះមានសិក្ខាកាមចំនួន២៥នាក់ក្នុងនោះ៨នាក់ជាស្ត្រីមកពី១២អង្គភាព ដែលខ្លះជាគ្រូកីឡាអត្តពលកម្ម គ្រូហែលទឹក គ្រូប្រណាំងកង់ ជាមន្ត្រីកីឡា កីឡាករ-កីឡាការិនីបានចូលរួមក្នុងវគ្ក សិក្សាដ៏សំខាន់នេះ ។
ឯកឧត្តម វ៉ាត់ ចំរើនអគ្គលេខាធិការគណៈកម្មាធិការជាតិអូឡាំពិកកម្ពុជាបានចូលរួមក្នុងពិធីបើកវគ្គសិក្សានេះ ។
ឯកឧត្តម បញ្ជាក់ថាកីឡាទ្រីយ៉ាត្លុងត្រូវការអត្តពលិកមានលក្ខណៈសម្បត្តិខាងហែលទឹក ប្រណាំងកង់ និង រត់ ។នៅកម្ពុជានៅមិនទាន់ មានកីឡាករកីឡាការិនីប្រភេទកីឡានេះទេ ក្រោយពីទទួលវគ្គនេះហើយឯកឧត្តម សំណូមពរឲ្យសហព័ន្ធទ្រីយ៉ាត្លុងរកកីឡាករ កីឡា ការិនី ដោយឡែកសម្រាប់កីឡានេះព្រោះមានគម្រោងបញ្ជូនកីឡានេះទៅ SEA Games លើកទី២៨នៅសឹង្ហបូរីនាឆ្នាំ២០១៥ផងដែរ ។
ដោយឡែកលោក STUDER FRANZ ជំនាញការកីឡាទ្រីយ៉ាត្លុងប្រសាសន៍ថាលោកនឹងព្យាយាមផ្ទេរនូវចំណេះដឹងដែលលោកមាន ព្រមទាំងបទពិសោធន៍ដល់សិក្ខាកាមទាំងអស់ដែលបានចូលរួមវគ្គនេះ ។លោកបន្តថាសិក្ខាកាមត្រូវតែមានជំនឿចិត្តលើខ្លួនឯងហើយខំសិក្សា ។
គួរបញ្ជាក់ថាកីឡាទ្រីយ៉ាត្លុងជាផ្លូវការគឺហែលទឹក១.៥០០ម៉ែត្រប្រណាំងកង់៤០គីឡូម៉ែត្រ និង រត់ចម្ងាយ១០គីឡូម៉ែត្រ ៕
មតិយោបល់