ភ្នំពេញ៖ សាលារាជធានីកំពុងតែជីកកន្លែងចាក់សំរាមថ្មីមួយ មានទំហំ ៨ហិកតានៅជិតពន្ធធនាគារព្រៃ-ស ខណៈពេលដែលកន្លែងចាក់សំរាមសព្វថ្ងៃទទួលសំរាមប្រមាណជា ១.៥០០តោនក្នុងមួយថ្ងៃ ហើយអាចនឹងពេញនៅក្នុងខែធ្នូខាងមុខនេះ។
បើយោងតាមសំដីរបស់លោក ងូ ចំរើន ប្រធានការិយាល័យគ្រប់គ្រងសំរាមខណ្ឌដង្កោបានឲ្យដឹងថា “ឥឡូវនេះ យើងកំពុងតែជីកកន្លែងចាក់សំរាមថ្មីមួយចម្ងាយប្រមាណ ៦០០ម៉ែត្រពីកន្លែងចាក់សំរាមចាស់ នឹងត្រូវពេញនៅខែធ្នូ ដូច្នេះត្រូវរៀបចំកន្លែងចាក់ថ្មីសម្រាប់ឆ្នាំ ២០១៥”។
កន្លែងចាក់សំរាមថ្មីនេះនឹងត្រូវប្រើសម្រាប់រយៈពេល៥ឆ្នាំបន្ទាប់ ប៉ុន្តែមិនទាន់មានគម្រោងដោះស្រាយក្លិនស្អុយនៅក្នុងតំបន់ជុំវិញកន្លែងនោះទេ ដោយសារសាលាក្រុងគ្មានលទ្ធភាពធ្វើដោយខ្លួនឯង ពីព្រោះខ្វះថវិកា។
គួរបញ្ជាក់ផងដែរថា បច្ចុប្បន្ន ស៊ីនទ្រី ជាក្រុមហ៊ុនប្រមូលសំរាមតែមួយគត់នៅក្នុងទីក្រុងភ្នំពេញ ហើយកាលពីថ្មីៗនេះ បានធ្វើឲ្យលោក ប៉ា សុជាតិវង្ស មិនសប្បាយចិត្តពាក់ព័ន្ធនឹងការសម្អាតទីក្រុង ជាពិសេសគេសង្កេតឃើញថា ក្រុមហ៊ុនមួយនេះមិនសូវសហការជាមួយនឹងសាលាក្រុងក្នុងការសម្អាតទីក្រុងសោះ៕
មតិយោបល់