ភ្នំពេញ ៖ យុវជន២នាក់ជិះម៉ូតូមួយគ្រឿងក្នុងល្បឿនលឿនត្រូវរថយន្តមួយគ្រឿងបើកបុកនៅចំណុចផ្លូវកែងបណ្ដាលអោយរងរបួសបាក់ជើងខាងស្ដាំទាំង២នាក់ ហើយរថយន្តបើករត់បាត់។ ហេតុការណ៍នេះបានកើតឡើងកាលពីវេលាម៉ោង១០និង១០នាទីយប់ថ្ងៃទី២៧ខែកក្កដាឆ្នាំ២០១៤ ត្រង់ចំណុចមុខសាលាបឋមសិក្សា អនុវត្តរាជធានីភ្នំពេញ តាមបណ្ដោយផ្លូវលេខ២៧១កែងផ្លូវលេខ២០០២ ស្ថិតក្នុងសង្កាត់ទឹកល្អក់៣ ខណ្ឌទួលគោក។
ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុគេឃើញយុវជន២នាក់ជិះម៉ូតូមួយគ្រឿងម៉ាកហុងដាឌ្រីម ធុនសេ១២៥ ពណ៌ខ្មៅ ពាក់ស្លាកលេខ ភ្នំពេញ 1CE-4872 ជិះធ្វើដំណើរតាមបណ្ដោយផ្លូវលេខ២៧១ក្នុងល្បឿនលឿន ទិសដៅពីជើងទៅត្បូង ស្រាប់តែមកដល់ចំណុចកើតហេតុ ក៏មានរថយន្តមួយគ្រឿងមិនចាំម៉ាក ធ្វើដំណើរយ៉ាងលឿនតាមបណ្ដោយផ្លូវលេខ២០០២ ទិសដៅពីលិចទៅកើត បំរុងបត់ឆ្វេងទៅផ្លូវលេខ២៧១ ក៏បុកម៉ូតូចំពេញទំហឹងប៉ើងខ្ទាតជាង១០ម៉ែត្របណ្ដាលអោយជនរងគ្រោះរងរបួសបាក់ជើងខាងស្ដាំទាំង២នាក់ ចំណែករថយន្តរងការខូចខាតផ្នែកខាងមុខបន្តិចបន្តួចបានបើករត់គេចបាត់។
បន្ទាប់ពីកើតហេតុជនរងគ្រោះត្រូវបានរថយន្តសាមុយដឹកបញ្ជូនទៅមន្ទីរពេទ្យភ្លាមៗ ចំណែកម៉ូតូសមត្ថកិច្ចបានយកមករក្សាទុករង់ចាំបងប្អូនជនរងគ្រោះមកដាក់ពាក្យបណ្ដឹងទទួលយកម៉ូតូទៅវិញ៕
មតិយោបល់