ភ្នំពេញ ៖ បុរសម្នាក់ជិះម៉ូតូក្នុងល្បឿនលឿន ដោយស្ថានភាពផ្លូវងងឹតពេកមើលមិនឃើញពុំនូកថ្មដែលគេចាក់គចោលសំរាប់ទុកបំពេញជង្ហុកធំមួយ ធ្វើអោយបុកហោះឡើងពុំនូកថ្មដួលរងរបួសរលាត់ដៃជើង ហេតុការណ៍នេះបានកើតឡើងកាលពីវេលាម៉ោង១១និង៣០នាទីយប់ថ្ងៃទី២៧ខែកក្កដាឆ្នាំ២០១៤ ត្រង់ចំណុចមុខសាលាអន្តរជាតិ ណតប្រ៊ីត តាមបណ្ដោយផ្លូវលេខ២០០៤ ស្ថិតក្នុងសង្កាត់ទឹកថ្លា ខណ្ឌសែនសុខ។
ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុមានបុរសម្នាក់ជិះម៉ូតូមួយគ្រឿងម៉ាកហុងដាឌ្រីម ធុនសេ១២៥ ពណ៌ខ្មៅ ពាក់ស្លាកលេខ ភ្នំពេញ 1AF-8805 ធ្វើដំណើរតាមបណ្ដោយផ្លូវលេខ២០០៤ក្នុងល្បឿនយ៉ាងលឿន ទិសដៅពីលិចទៅកើត ស្រាប់តែមកដល់ចំណុចកើតហេតុ ដោយស្ថានភាពផ្លូវងងឹតពេកមើលមិនឃើញពុំនូកថ្មដែលគេចាក់គចោរសំរាប់ទុកបំពេញជង្ហុកធំមួយ ធ្វើអោយម៉ូតូជនរងគ្រោះបុកហោះឡើងពុំនូកថ្មធ្លាក់មកវិញដួលរងរបួសរលាត់ដៃជើងដាច់មុខម៉ាត់។ បន្ទាប់ពីកើតហេតុរថយន្តសាមុយបានមកដឹកជនរងគ្រោះទៅមន្ទីរពេទ្យ ប៉ុន្តែជនរងគ្រោះមិនព្រមឡើងរថយន្ត ដោយសុខចិត្តទូរស័ព្ទហៅបងប្អូនមកទទួលទៅមន្ទីរពេទ្យដោយខ្លួនឯងវិញ ចំណែកម៉ូតូសមត្ថកិច្ចក៏បានប្រគល់អោយបងប្អូនជនរងវិញភ្លាមៗនៅកន្លែងកើតហេតុផងដែរ។
សូមបញ្ជាក់ថា ចំពោះកំណាត់ផ្លូវលេខ២០០៤ នៅចំណុចខ្លះកំពុងធ្វើការជួសជុលនិងមិនមានភ្លើងបំភ្លឺផ្លូវ ជាហេតុបង្កគ្រោះថ្នាក់ដោយអ្នកធ្វើដំណើរកាត់ទីនោះដោយចៃដន្យ ដូចករណីនេះគឺបុរសរងគ្រោះមើលមិនឃើញពុំនូកថ្មដែលគេចាក់គចោរសំរាប់ទុកបំពេញជង្ហុកធំមួយនៅចំកណ្ដាលផ្លូវដោយមិនបានដាក់ស្លាកសញ្ញាសំគាល់ប្រាប់អ្នកដំណើរផ្សេងដែលបើកឆ្លងកាត់ទីនោះឡើយ ទើបជួបគ្រោះថ្នាក់តែម្ដង សំណាងល្អគ្រាន់តែរងរបួសស្រាល ចុះបើរហូតដល់ថ្នាក់បាត់បង់ជីវិតវិញ តើនរណាជាអ្នកទទួលខុសត្រូវ?
មតិយោបល់