ភ្នំពេញ ៖ រថយន្តទួរីសមួយគ្រឿងដឹកផ្លែមង្ឃុតពីខេត្តកោះកុងយកមកឲ្យម៉ូយនៅផ្សារនាគមាស បានបុករះរនាំងដែកពុះចែកទ្រូងផ្លូវបាក់អស់ចំនួន៨ផ្ទាំង ហើយបំណែករនាំងដែកបានចាក់ទម្លុះរថយន្តធ្លាយទៅជុងអ្នកបើកបរចំទ្រូងខាងស្ដាំបណ្ដាលឲ្យស្លាប់ភ្លាមៗនៅកន្លែងកើតហេតុ។ ហេតុការណ៍នេះបានកើតឡើងកាលពីវេលាម៉ោង២និង៣០នាទីរំលងអាធ្រាត្រឈានចូលថ្ងៃទី២៩ខែកក្កដាឆ្នាំ២០១៤ ត្រង់ចំណុចមុខក្រុមហ៊ុនរថយន្ត ម៉ាសដា (MAZDA) តាមបណ្ដោយមហាវិថីសហព័ន្ធរុស្ស៊ី ស្ថិតក្នុងសង្កាត់ទឹកថ្លា ខណ្ឌសែនសុខ។
ប្រភពព័ត៌មានពីកន្លែងកើតហេតុបានឲ្យដឹងថា គេបានឃើញរថយន្តទួរីសមួយគ្រឿងដឹកផ្លែឈើយ៉ាងពេញក្នុងរថយន្តនិងលើដំបូល ធ្វើដំណើរតាមបណ្ដោយផ្លូវសហព័ន្ធរុស្ស៊ីក្នុងល្បឿនយ៉ាងលឿន ស្រាប់តែមកដល់ចំណុចកើតហេតុក៏បានរេចង្កូតបុករនាំងដែកពុះចែកទ្រូងផ្លូវបាក់អស់ចំនួន៨ផ្ទាំងបណ្ដាលឲ្យបុរសជាអ្នកបើកបរជុងនិងបំណែករនាំងដែកចំទ្រូងខាងស្ដាំស្លាប់ភ្លាមៗតែម្ដង។
ជនរងគ្រោះដែលស្លាប់ឈ្មោះ សំ ផាត អាយុ២២ឆ្នាំជាព្រូរថយន្ត (ជាអ្នកកាន់ចង្កូតរថយន្តបង្កឲ្យមានគ្រោះថ្នាក់) និងម្នាក់ទៀតរងរបួសស្រាលឈ្មោះ តឿ អាយុ២៧ឆ្នាំជាតៃកុង (អង្គុយនៅខាងស្ដាំក្បែរអ្នកកាន់ចង្កូត) អ្នកទាំង២មានទីលំនៅភូមិបឹងព្រាវ ស្រុកស្រែអំបិល ខេត្តកោះកុង។
បើតាមសម្ដីឈ្មោះ តឿ ដែលរងរបួសស្រាលបានឲ្យដឹងថានៅមុនពេលកើតហេតុ រូបគេទាំង២នាក់បានរៀបចំផ្លែមង្ឃុតដាក់លើរថយន្តនៅខេត្តកោះដើម្បីដឹកយកមកឲ្យម៉ូយនៅផ្សារនាគមាសរាជធានីភ្នំពេញ បានចេញដំណើរពីខេត្តកោះកុងម៉ោង៧យប់ធ្វើដំណើរឆ្ពោះមករាជធានីភ្នំពេញដោយរូបគេជាអ្នកបើករថយន្ត ខណ:ធ្វើដំណើរមកដល់បានពាក់កណ្ដាលផ្លូវរូបគេក៏បានប្ដូរឲ្យព្រូឈ្មោះ សំ ផាត បើកបរជំនួសម្ដង ស្រាប់តែធ្វើដំណើរមកដល់ជិតចំណុចកើតហេតុក៏មានគេទូរស័ព្ទមកហើយឈ្មោះ សំ ផាត ជាអ្នកកាន់ចង្កូតរថយន្ត បានលូកដៃយកទូរស័ព្ទក៏រេចង្កូតរថយន្តជ្រុលទៅបុករនាំងដែកពុះចែកទ្រូងផ្លូវតែម្ដងបណ្ដាលឲ្យឈ្មោះ សំ ផាត ដែលជាអ្នកកាន់ចង្កូតរថយន្តជុងនិងបំណែករនាំងដែកចំទ្រូងខាងស្ដាំស្លាប់ភ្លាមៗតែម្ដង ចំណែករូបគេមិនមានរងគ្រោះថ្នាក់អ្វីនោះទេ។
បន្ទាប់ពីកើតហេតុសមត្ថកិច្ចមូលដ្ឋានបានចុះមកអន្តរាគមន៍ដល់កន្លែងកើតហេតុភ្លាមៗ និងបានប្រគល់សពជនរងគ្រោះឲ្យទៅក្រុមគ្រួសារយកទៅរៀបចំធ្វើបុណ្យតាមប្រពៃណី ចំណែករថយន្តសមត្ថកិច្ចជំនាញបានធ្វើការវាស់វែងស្ទូចយកមករក្សាទុករង់ចាំធ្វើការដោះស្រាយតាមផ្លូវច្បាប់៕
មតិយោបល់