អ៊ីតាលី ៖សារព័ត៌មានក្នុងប្រទេសអ៊ីតាលីបានចុះផ្សាយ ឲ្យដឹងថា ក្លិប Napoli បានព្យាយាម ខ្ចីខ្សែបម្រើ របស់ក្លិបបិសាចក្រហម Marouane Fellaini ឲ្យបានមុនរដូវកាលក្របខណ្ឌ Serie A ឆ្នាំនេះ ។
កីឡាករសញ្ជាតិប៊ែលហ្សិក ត្រូវបានអតីតគ្រូបង្វឹកបិសាចក្រហម David Moyes ទិញពី Everton ក្នុងតម្លៃខ្លួន ២៧,៥ លានផោន ប្រហែល ៤៦ លានដុល្លារ ។
Marouane Fellaini បានបង្ហាញខ្លួន ២១ លើក លេងឲ្យបិសាចក្រហមកន្លងមក ដោយអំឡុងពេលនោះ ក៏មានរបួសដៃផងដែរ ពេលនេះវិញ គាត់ក៏ដូចជាជម្រើសចុងក្រោយរបស់ អ្នកគ្រប់គ្រងថ្មី Louis van Gaal ។
ក្លិបយក្សអង់គ្លេស បានបើកចំហរលក់កីឡាករ សក់សំបុកមាន់ Marouane Fellaini ប៉ុន្តែភាគីអ៊ីតាលី បានដាក់ពាក្យស្នើរសុំ ដោយខ្ចីជើង ចំនួន ១២ ខែ នេះបើតាមការចុះផ្សាយរបស់ Corriere dello Sport ។
សារព័ត៌មានខាងលើ បានបន្តថា ខាងនាយកក្លិប Napoli លោក Riccardo Bigon ក៏បានធ្វើដំណើរមកអង់គ្លេស ដើម្បីពិភាក្សា ជាមួយនឹងបិសាចក្រហម លើកម្ជីខាងលើ ៕
មតិយោបល់