ភ្នំពេញ ៖ នារី២នាក់ជិះម៉ូតូ មួយគ្រឿងកំពុងធ្វើដំណើរតាមផ្លូវមកដល់ចំណុចផ្លូវបែកជាបួនស្រាប់តែមានរថយន្តលុចស៊ីស៥៧០មួយគ្រឿងបើកក្នុងល្បឿនលឿនក៏បុកចំម៉ូតូបណ្ដាលអោយនារីទាំង២នាក់ដួលរងរបួសធ្ងន់ស្រាល។ ហេតុការណ៍នេះបានកើតឡើងកាលពីវេលាម៉ោង៧និង៥០នាទីយប់ថ្ងៃទី១២ខែសីហាឆ្នាំ២០១៤ ត្រង់ចំណុចផ្លូវបែកជាបួន តាមបណ្ដោយផ្លូវលេខ៤៥៤កែងផ្លូវលេខ១២៣ ស្ថិតក្នុងសង្កាត់ទួលទំពូង១ ខណ្ឌចំការមន។
ប្រភពព័ត៍មានពីកន្លែងកើតហេតុបានអោយដឹងថា នៅមុនពេលកើតហេតុគេឃើញនារី២នាក់ជិះម៉ូតូ មួយគ្រឿងម៉ាកហុងដាឃ្លីក ពណ៍ក្រហមលាយស ពាក់ស្លាកលេខ ភ្នំពេញ 1AF-2117 ធ្វើដំណើរតាមបណ្ដោយផ្លូវលេខ៤៥៤ ទិសដៅពីលិចទៅកើត ស្រាប់តែមកដល់ចំណុចផ្លូវបែកជាបួនកែងផ្លូវលេខ១២៣ក៏មានរថយន្តមួយគ្រឿងម៉ាកលុចស៊ីសLX570 ពណ៍ខ្មៅ ពាក់ស្លាកលេខ ភ្នំពេញ 2AA-4622 បើកដោយបុរសម្នាក់និងរួមដំណើរជាមួយនារីម្នាក់ធ្វើដំណើរតាមបណ្ដោយផ្លូវលេខ១២៣ ទិសដៅពីត្បូងទៅជើង ក៏បុកប៉ះម៉ូតូដួលបណ្ដាលអោយនារីម្នាក់រងរបួសជើងខាងស្ដាំនិងម្នាក់ទៀតរងរបួសស្រាល។
បន្ទាប់ពីកើតហេតុភាគីខាងរថយន្តមិនចុះមកមើលជនរងគ្រោះទេគឺអង្គុយក្នុងរថយន្តហើយចុចទូរស័ព្ទធ្វើមិនដឹង ភ្លាមៗប្រជាពលរដ្ឋជាច្រើនក៏បានមកចោមរោមមើលហេតុការណ៍គ្រោះថ្នាក់ចរាចរនេះផងដែរ។
មួយសន្ទុះក្រោមមកសមត្ថកិច្ចមូលដ្ឋានក៏បានចុះទៅអន្តរាគមន៍និងបានអោយភាគីទាំង២ធ្វើការសម្របសម្រួលគ្នា ដោយភាគីខាងម៉ូតូ សុំសំណងពីខាងរថយន្តចំនួន៥០០ដុល្លារដើម្បីព្យាបាលរបួសនិងជួសជុលម៉ូតូ ប៉ុន្តែភាគីខាងរថយន្តមិនព្រមដោយព្រមសងតែ១០០ដុល្លារ ហើយភាគីទាំង២បានធ្វើការដោះស្រាយគ្នាជាង១ម៉ោងក៏សម្រេចដោយភាគីខាងរថយន្តព្រមសងសំណងចំនួន២០០ដល់ភាគីខាងម៉ូតូ ហើយភាគីម៉ូតូ ក៏ព្រមទទួលសំណងដើម្បីបញ្ចប់រឿងនៅកន្លែងកើតហេតុ៕
មតិយោបល់