ភ្នំពេញ ៖ យុវជន២នាក់ក្នុងចំណោម៣នាក់ត្រូវបានសមត្ថកិច្ចនគរបាលប៉ុស្តិ៍ផ្សារដើមថ្កូវឃាត់ធ្វើការត្រួតពិនិត្យរកឃើញថ្នាំញៀនប្រភេទក្រាមសថ្លា១កញ្ចប់តូចនៅក្នុងហោប៉ៅខោរួចក៏បានបញ្ជូនមកប៉ុស្តិ៍ដើម្បីធ្វើការសួរនាំ។ ហេតុការណ៍នេះបានកើតឡើងកាលពីវេលាម៉ោង១០និង១០នាទីយប់ថ្ងៃទី១២ខែសីហាឆ្នាំ២០១៤ ត្រង់ចំណុចក្បែរក្រុមហ៊ុនហុងដា តាមបណ្ដោយផ្លូវព្រះមុនីវង្ស ស្ថិតក្នុងសង្កាត់ផ្សារដើមថ្កូវ ខណ្ឌចំការមន។
យុវជនសង្ស័យទាំង២នាក់ឈ្មោះ ហង្ស សុជា អាយុ២០ឆ្នាំមុខរបរមិនពិតប្រាកដ ស្នាក់នៅម្ដុំសង្កាត់ទួលទំពូង១ ខណ្ឌចំការមន ម្នាក់ទៀតឈ្មោះ ប្រាក់ តារា អាយុ១៧ឆ្នាំមុខរបរមិនពិតប្រាកដ ស្នាក់ម្ដុំសង្កាតច្បារអំពៅ១ ខណ្ឌច្បារអំពៅ និងម្នាក់ទៀតបានរត់គេចខ្លួនបាត់ ហើយសមត្ថកិច្ចបានដកហូតថ្នាំញៀនប្រភេទក្រាមសថ្លា១កញ្ចប់តូចនិងម៉ូតូមួយគ្រឿងម៉ាកហុងដាធូដេ ពណ៌ស មិនមានស្លាកលេខ។
សមត្ថកិច្ចបានអោយដឹងថានៅមុនពេលកើតហេតុពួកគាត់កំពុងជិះម៉ូតូល្បាតក្នុងមូលដ្ឋាន ក៏ប្រទះឃើញយុវជន៣នាក់គួរអោយសង្ស័យគាត់ក៏បានជិះម៉ូតូ មកជិតដើម្បីធ្វើការត្រួតពិនិត្យស្រាប់តែយុវជនម្នាក់ដឹងខ្លួនក៏រត់គេចបាត់ ហើយសមត្ថកិច្ចក៏បានឃាត់ខ្លួនយុវជនទាំង២នាក់ធ្វើការត្រួតពិនិត្យរកឃើញថ្នាំញៀនប្រភេទក្រាសថ្លា១កញ្ចប់តូចនៅក្នុងហោប៉ៅខោខាងក្រោយឈ្មោះ ប្រាក់ តារា ហើយយុវជនសង្ស័យទាំង២ប្រាប់សមត្ថកិច្ចថាមិនមែនថ្នាំញៀនអីនោះទេគឺជា សាច់ជូ ទេ ប៉ុន្តែទោះជាមានការបកស្រាយយ៉ាងណាសមត្ថកិច្ចនៅតែបញ្ជូនយុវជនសង្ស័យទាំង២នាក់មកប៉ុស្ដិ៍នគរបាលរដ្ឋបាលផ្សារដើមថ្កូវដើម្បីធ្វើការសួរនាំនិងកសាងសំណុំរឿងបញ្ជូនទៅតុលាការផ្ដន្ទាទោសតាមផ្លូវច្បាប់៕
មតិយោបល់