ភ្នំពេញ ៖ បុរសនិងស្ត្រីជនជាតិចិន២នាក់បានបើករថយន្តមួយគ្រឿងបោះពួយក្នុងល្បឿនលឿនជ្រុលទៅបុករបាំងថ្មពុះចែកទ្រូងផ្លូវបាក់អស់ចំនួន៣កង់ ហើយរថយន្តរងការខូចខាតខ្ទេចកង់មុខខាងឆ្វេងទៅមុខលែងរួច។ ហេតុការណ៍នេះបានកើតឡើងកាលពីវេលាម៉ោង ២និង៣០នាទីរំលងអាធ្រាត្រឈានចូលថ្ងៃទី១៣ខែសីហាឆ្នាំ២០១៤ ត្រង់ចំណុចស្ដុបអូរឡាំពិក តាមបណ្ដោយផ្លូវព្រះសីហនុកែងផ្លូវលេខ១៩៩ ស្ថិតក្នុងសង្កាត់វាលវង់ ខណ្ឌ៧មករា។
ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុគេឃើញបុរសនិងស្ត្រីជាជនជាតិចិន២នាក់បានបើករថយន្តមួយគ្រឿងម៉ាករ៉េងរ៉ូវើ មីនី ពណ៌ខ្មៅ ភ្នំពេញ 2Z-8616 ធ្វើដំណើរតាមបណ្ដោយផ្លូវព្រះសីហនុក្នុងល្បឿនយ៉ាងលឿន ទិសដៅពីកើតទៅលិចស្រាប់តែមកចំណុចកើតហេតុជាផ្លូវកោងបត់ទៅស្ដាំរថយន្តបោះពួយលឿនខ្លាំងពេកបួងចង្កូតមិនទាន់ក៏ជ្រុលទៅបុករបាំងថ្មពុះចែកទ្រូងផ្លូវបាក់អស់ចំនួន៣កង់ រថយន្តរងការខូចខាតផ្នែកខាងមុខយ៉ាងដំណំ ហើយរថយន្តបង្កព្យាយាមបើករត់ប៉ុន្តែដោយសារថយន្តរងការខូចខាតខ្ទេចកង់មុខខាងឆ្វេងទើបមិនអាចបន្តដំណើរទៅមុខទៀតបាន។ បន្ទាប់ពីកើតហេតុសមត្ថកិច្ចមូលដ្ឋានបានចុះមកអន្តរាគមន៍ភ្លាមៗដល់កន្លែងកើតហេតុនិងបានឃាត់ស្ត្រីដែលជិះរថយន្តបង្កចំណែកបុរសដែលរួមដំណើរជាមួយបានរត់គេចពីកន្លែងកើតហេតុបាត់។
ក្រោយពេលកើតហេតុសមត្ថកិច្ចជំនាញបានចុះមកត្រួតពិនិត្យនិងស្ទូចយករថយន្តទៅរក្សាទុកនៅការិយាល័យចរាចរជើងគោកនៃស្នងការដ្ឋាននគរបាលរាជធានីភ្នំពេញដើម្បីធ្វើការដោះស្រាយតាមផ្លូវច្បាប់៕
មតិយោបល់