ខេត្តក្រចេះ៖ ឈើជ្រៀកលេខមួយប្រភេទផ្ចឹកជិត១ពាន់កំណាត់ដែលក្រុមឈ្មួញកំពុងធ្វើសកម្មភាព
ដឹកជញ្ជូនដោយខុសច្បាប់យកមករក្សាទុកយ៉ាងអនាធិប្បតេត្យ នៅចំនុចមុខវត្តខ្សាច់ទុបស្ថិតក្នុងភូមិខ្សាច់ទុប ឃុំជ្រោយបន្ទាយ ស្រុកព្រែកប្រសព្វ ខេត្តក្រចេះ កាលពីថ្ងៃទី១៤ខែសីហា ព្រមទាំងលើកដាក់លើទូកបានមួយចំនួនដើម្បីត្រៀមដឹកទៅលក់នៅខេត្តកំពង់ចាម ត្រូវកម្លាំងរដ្ឋបាលព្រៃឈើស្រុកព្រែកប្រសព្វធ្វើការចាប់បង្ក្រាបទាំងទើសទាល់ មូលហេតុដោយសារតែមានការរិះគន់និងសេចក្តីរាយការណ៏ពីប្រជាពលរដ្ឋក្នុងមូលដ្ឋាន ។
បើយោងតាមប្រភពព័ត៏មានច្បាស់ការណ៍បានឲ្យដឹងថា ឈើដែលមេព្រៃស្រុកចាប់បង្ក្រាបល្ងាចម្សិលមិញនេះ គឺមានការលួចជំលាសចេញខ្លះតាមរទេះនាពេលយប់ដោយសារតែឈ្មួញរកស៊ីឈើម្នាក់ឈ្មោះ ហ៊ុយ មានទីលំនៅឃុំ ពាមកោះស្នា ស្រុកស្ទឹងត្រង់ បានទិញពីម្ចាស់ដើមដែលដឹកចេញពីព្រៃហើយមិនទាន់ឲ្យលុយពួកគាត់ ជាហេតុធ្វើឲ្យពួកគាត់មកដណ្តើមយកឈើនេះពីសមត្ថកិច្ចមេព្រៃត្រឡប់ទៅវិញយ៉ាងស្រួលពុំមានការរារាំងឡើយ។
ទាក់ទងនឹងការចោទប្រកាន់ខាងលើ លោក មិញ សេដ្ឋា នាយសង្កាត់រដ្ឋបាលព្រៃឈើជ្រោយបន្ទាយបានឲ្យដឹងថា ឈើជ្រៀកដែលក្រុមឈ្មួញយកមករក្សាទុកនៅមុខវត្តខ្សាច់ទុបពេលនេះ គឺកម្លាំងរដ្ឋបាលព្រៃឈើនិងអជ្ញាធរឃុំបានប្រមូលយករក្សាទុកនៅទីស្នាក់ការរដ្ឋបាលព្រៃឈើជ្រោយបន្ទាយទាំងយប់ ហើយមានចំនួន៦៥០ដើមរួមទាំងទូកម៉ាស៊ីនមួយគ្រឿងផងដែរ។
ប្រភពពីប្រជាពលរដ្ឋក្នុងឃុំជ្រោយបន្ទាយបាននិយាយឲ្យដឹងថា សកម្មភាពដឹកជញ្ជូនឈើជ្រៀកលេខ១ផ្ចឹក ឈើប្រណិត និងឈើប្រភេទផ្សេងទៀតក្នុងទឹកដីស្រុកព្រែកប្រសព្វខេត្តក្រចេះគឺមិនមែនកើតឡើងក្នុងពេលថ្មីៗនេះទេសកម្មភាពខុសច្បាប់នៃបទល្មើសព្រៃឈើយ៉ាងគគ្រឹកគគ្រេងនិងយ៉ាងអនាធិប្បតេយ្យ គឹបានកើតឡើងជាយូយាណាស់មកហើយដោយគេមិនសូវឃើញមានការបង្ក្រាបពីជំនាញផ្នែករដ្ឋបាលព្រៃឈើព្រែកប្រសព្វនិងសង្កាត់រដ្ឋបាលព្រៃឈើជ្រោយបន្ទាយដែលគ្រប់គ្រងនៅតំបន់នោះឡើយ។ប៉ុន្តែបើប្រជាពលរដ្ឋដឹកឈើទៅធ្វើផ្ទះឬយកទៅសាងសង់ស្ពានដែលបាក់ស្រុតខូចខាតដើម្បីបម្រើផលប្រយោជន៍សាធារណះវិញគឺអស់លោកមន្ត្រីជំនាញចាប់បង្ក្រាបគ្មានប្រណីទេ។
ប្រភពបានបន្តទៀតថា ជាក់ស្តែងដូចក្នុងករណីឈើជ្រៀតលេខ១ជាប្រភេទឈើផ្ចឹកដែលសុទ្ឋសឹងជាឈើខុសច្បាប់ដែលក្រុមឈ្មួញយមករក្សាទុកនៅមុខវត្តខ្សាច់ទប់ក្បែរនឹងទីតាំងសង្កាត់រដ្ឋបាលព្រៃឈើជ្រោយបន្ទាយរបស់លោក មិញ សេដ្ឋា ត្រៀមជញ្ជួនដាក់ទូកដឹកទៅលក់នៅខេត្តកំពង់ចាមនិងត្បួងឃ្មុំត្រូវបានលោកនាយសង្កាត់រូបនេះបញ្ជាក់ប្រាប់ថា លោកមិនថាដឹងនោះទេ។ប៉ុន្តែបើតាមការអះអាងពីប្រជាពលរដ្ឋនៅឃុំជ្រោយបន្ទាយបានឲ្យដឹងថា ការឆ្លើយតបរបស់លោក មិញ សេដ្ឋា និងមេព្រៃនៅតំបន់នោះគឺជាការដោះសារយករួចខ្លួនតែប៉ុណ្ណោះ។ព្រោះថារាល់បទល្មើសព្រៃឈើដែលកំពុងកើតឡើងក្នុងឃុំជ្រោយបន្ទាយក៏ដូចជានៅទូទាំងស្រុកព្រែកប្រសព្វបើមិនមានការបើកភ្លើងខៀវពីលោក អ៊ុយ ស្រី ដែលជានាយផ្នែក និងលោក មិញ សេដ្ឋា នាយសង្កាត់ទេ នោះបទល្មើសព្រៃឈើទាំងនេះមិនអាចដំណើរការទៅបានរលូននោះទេ។
ទាក់ទងនឹងការចោទប្រកាន់របស់ប្រជាពលរដ្ឋខាងលើ លោក មិញ សេដ្ឋា នាយសង្កាត់រដ្ឋបាលព្រៃឈើជ្រោយបន្ទាយបានបញ្ជាក់ឲ្យដឹងថា ទាំងអស់នេះគឺជាការចោទប្រកាន់ខុសពីការពិត ព្រោះថាបច្ចុប្បន្នកម្លាំងជំនាញរបស់លោកកំពុងតែចុះបង្ក្រាបបទល្មើសព្រៃឈើនៅក្នុងដែនសមត្ថកិច្ចដូចភ្លៀងរលឹមមិនអនុញ្ញាតឲ្យមានការរកស៊ីឈើខុសច្បាប់ឡើយ៕
មតិយោបល់