ក្រោយពី Facebook ទិញបាន ៤ខែនោះ WhatsApp បានកើនចំនួនអ្នកប្រើប្រាស់បន្ថែម ១០០លាននាក់ ហើយលោក Mark Zuckerberg នាយកប្រតិបត្តិ Facebook និងជាមហាសេដ្ឋីវ័យក្មេងផងនោះ បាននិយាយថា WhatsApp នឹងផ្សារភ្ជាប់ទៅកាន់មនុស្ស ១ពាន់លាននាក់នៅជុំវិញពិភពលោក។
នៅថ្ងៃនេះ លោក Jan Koum សហស្ថាបនិក និងជានាយកប្រតិបត្តិ WhatsApp បានបង្ហើបឲ្យដឹងនៅលើបណ្ដាញ Twitter ថា ចំនួនអ្នកប្រើប្រាស់ WhatsApp បានកើនឡើងដល់ ៦០០លាននាក់។ លោកបានបញ្ជាក់បន្ថែមទៀតថា ក្នុងចំណោមទាំង ៦០០លាននាក់នោះ ពួកគេបានផ្ញើសារជាអក្សរ សំឡេង វីដេអូ រូបភាព និងរូបថ្លុកផ្សេងៗទៅកាន់មិត្តភ័ក្តិ អាចនិយាយបានថា នៅពេលនេះ WhatsApp គឺជាកម្មវិធីមួយដ៏ពេញនិយម។
គួរបញ្ជាក់ផងដែរថា Facebook បានជះលុយ ១៩ពាន់លានដុល្លារអាមេរិក ទិញយកកម្មវិធី WhatsApp កាលពីខែកុម្ភៈ ដែលជាការទិញលក់ដ៏កក្រើកនៅក្នុងដើមឆ្នាំ ២០១៤៕
មតិយោបល់