ភ្នំពេញ៖ យុវសិស្សសាលាភាសាកូរ៉េម្នាក់ត្រូវក្រុមចោរប្លន់មានគ្នា៤នាក់ជិះម៉ូតូ២គ្រឿងប្រដាប់ដោយកាំភ្លើងខ្លី២ដើមធ្វើសកម្មភាពភ្ជង់ប្លន់យកម៉ូតូទៅបាត់ដោយសុវត្ថិភាព ខណ: យុវជនរងគ្រោះជិះម៉ូតូ ម្នាក់ឯងត្រឡប់ទៅផ្ទះវិញដល់ពាក់កណ្តាល កាលពីវេលាម៉ោង៨និង៣០នាទីយប់ថ្ងៃទី២ខែកញ្ញា ឆ្នាំ២០១៤ស្ថិតនៅតាមបណ្តោយផ្លូវជាតិលេខ៣ក្នុងភូមិព្រៃព្រីងខាងត្បូង សង្កាត់ចោមចៅ ខណ្ឌពោធិ៍សែនជ័យ។
នគរបាលបានឲ្យដឹងថា យុវជនរងគ្រោះមានឈ្មោះ គិន ចាន់ថន ភេទប្រុសអាយុ២៧ឆ្នាំមានមុខរបរជាអ្នកលក់គ្រឿងទូរស័ព្ទនិងជាអ្នកសិស្សរៀនភាសាកូរ៉េស្នាក់នៅក្នុងភូមិត្រាំស្លឹក សង្កាត់កន្ទោក ខណ្ឌពោធិ៍សែនជ័យ មានស្រុកកំណើតនៅភូមិសំណខ្មៅ ឃុំសំណរខ្មៅ ស្រុកទ្រាំង ខេត្តតាកែវ ជិះម៉ូតូមួយគ្រឿងម៉ាកសេ១២៥ពណ៌ខ្មៅសេរីឆ្នាំ២០១៣ឡើងតែមឆ្នាំ២០១៤ពាក់ស្លាកលេខតាកែវ 1H-8647។ យុវជនរងគ្រោះបានរៀបរាប់ប្រាប់នគរបាលថា កាលពីវេលាម៉ោង៦ជាងរូបគេបានជិះម៉ូតូ ម្នាក់ឯងមករៀនភាសាកូរ៉េនៅខាងលិចសាលាសង្កាត់ចោមចៅ បន្ទាប់ពីរៀនចប់បានជិះម៉ូតូទៅរង្វង់មូលចោមចៅហូបបង្អែមលុះប្រហែលម៉ោង៨និង២០នាទីបានជិះម៉ូតូតាមបណ្តោយផ្លូវជាតិលេខ៣ក្នុងគោលបំណងត្រឡប់ទៅផ្ទះវិញ លុះដល់ចំណុចកើតហេតុស្រាប់តែមានជនសង្ស័យ៤នាក់ជិះម៉ូតូពីរគ្រឿងមួយគ្រឿងម៉ាកSZពណ៌ក្រហមនិងមួយគ្រឿងទៀតម៉ាកវីវ៉ា១២៥ដោយមួយគ្រឿងបានជិះមកស្ទាក់ពីមុខនិងមួយគ្រឿងទៀតជិះគៀររួចហើយអ្នកអង្គុយខាងក្រោយចុះពីលើម៉ូតូដកកាំភ្លើងខ្លី១ដើមម្នាក់មកក្រៀកភ្ជង់គាំមិនឲ្យស្រែករួចហើយប្លន់យកម៉ូតូទៅបាត់ដោយសុវត្ថិភាព ពេលដែលជនសង្ស័យធ្វើសកម្មភាពរួចហើយយុវជន រងគ្រោះពុំបានស្រែកធ្វើឲ្យមានការភ្ញាក់ផ្អើលនោះទេ បានដើរទៅកន្លែងស្នាក់នៅយ៉ាងស្ងាត់ទៅផ្ទះហើយក៏បានប្រាប់បងប្អូនទើបនាំគ្នាមកដាក់ពាក្យបណ្តឹងនៅប៉ុស្តិ៍នគរបាលចោមចៅឲ្យជួយអន្តរាគមន៍។
យុវជនរងគ្រោះបានបន្តថា ជនសង្ស័យទាំង៤នាក់នោះគឺពុំចាំអត្តសញ្ញាណនោះទេប៉ុន្តែ២នាក់មានវ័យប្រហែលជា៤០ឆ្នាំជាងជិះម៉ូតូSZនិងពីរនាក់ទៀតអាយុប្រហែលជា២៥ឆ្នាំជិះម៉ូតូវីវ៉ា បន្ទាប់ពីធ្វើសកម្មភាពប្លន់រួចបាននាំគ្នាជិះម៉ូតូគេចខ្លួនទៅទិសខាងត្បូងបាត់ ៕
មតិយោបល់