អង់គ្លេស​៖អ្នកចាត់ការទូទៅក្លិប Arsenal លោក Arsene Wenger បានទទូចថា ក្រុមរបស់គាត់ ត្រូវបានប្រឈមមុខ​នឹង​វិបត្តិការពារមួយ ​បន្ទាប់ពីកីឡាករ Mathieu Debuchy របួស​កជើងកាលពីថ្ងៃសៅរ៍ ។​

Arsene Wenger នឹង​ដឹកនាំក្រុមលេងនៅយប់ថ្ងៃអង្គារនេះ ដោយប៉ះ ​ជាមួយនឹង Borussia Dortmund ​ក្នុងក្របខណ្ឌ Champions League តែ​ខ្វះខាតកម្លាំងការពារ Debuchy និង Nacho Monreal ខណៈដែល Calum Chambers កំពុងប្រឈមនឹងបញ្ហាបំពងក ។​

ដើម្បីប៉ះប៉ូវនូវចំណុចខ្វះខាត កីឡាករ វ័យ ១៩ ឆ្នាំ Hector Bellerin ​អាចនឹងមានឱកាស​អភិវឌ្ឈន៍ខ្លួន លេងជួសតំណែង កីឡាកររបួសខាងលើ ។ ជាមួយនឹងចំណុចខ្វះខាតខ្សែការពារនេះ ​មិនបានធ្វើឲ្យ Wenger ភិតភ័យនោះទេ ។​

អ្នកយុទ្ធសាស្ត្រទីលានសញ្ជាតិបារាំងរូបនេះ បាន​ថ្លែងទៅកាន់ អ្នកសារព័ត៌មានថា “ខ្ញុំមិនមានអារម្មណ៍តានតឹងនោះទេ កីឡាករ Mathieu Debuchy របួសកជើងមែនពិត តែលទ្ធផល ស្កេនបញ្ជាក់ថា គាត់នឹងវិល​ក្នុងពេលឆាប់ៗ​ខាងមុខនេះ ហើយយើង​ក៏មានកីឡាករ​លេងជួសរួចហើយ នោះគឺ Hector Bellerin អាចលេងក្នុង​ខ្សែការពារកណ្តាល ឥឡូវត្រៀមខ្លួនជាស្រេចដើម្បីត្រៀមខ្លួនប្រកួត​” ។​ បុរសបារាំងរូបនេះបានបន្តទៀតថា “កីឡាករ Hector Bellerin គាត់ជាក្មេងប្រុស​ដែលមាន​គុណសម្បត្តិពេញលេញ ដោយ​មិនខ្លាចប្រឈមនឹងសម្ពាធ ។ ម្យ៉ាងទៀតបាល់គាត់លេងលឿនផងដែរ​ បើទោះបីជាខ្វះបទពិសោធការពារ តែ​អាចនឹងលេងបាន​” ៕​