កោះកុង ៖ មានសំណង់កំពង់ផែឯកជនជាច្រើនកន្លែងណាស់នៅក្នុងខេត្តកោះកុង ត្រូវគេរាយការណ៍មកថា កំពុងតែសាងសង់ដោយគ្មានច្បាប់អនុញ្ញាត ព្រមជាមួយគ្នានេះ ដីចំណីព្រលានយន្តក្នុងនេះ ក៏មានសេចក្តីរាយការណ៍ពីការរំលោភយកពីក្រុមអ្នកមានអំណាចផងដែរ។
ចំពោះសំណង់កំពង់ផែឯកជនដែលគ្មានច្បាប់អនុញ្ញាត ដែលមានខ្លះបានសាងសង់ស្ទើរតែរួចរាល់ហើយនោះ ត្រូវគេរាយការណ៍មកថា មាននៅតាមបណ្តោយឆ្នេរកោះប៉ោ ជិតកំពង់ផែដងទង់ ស្ថិតនៅភូមិ២ សង្កាត់ដងទង់ ក្រុងខេមរភូមិន្ទ ដែលគេសង្ស័យថា ម្ចាស់ផែឯកជនទាំងនោះអាចឃុបឃិតជាមួយនឹងអាជ្ញាធរ ។
ដោយឡែកដីចំណីព្រលានយន្តហោះវិញ ក៏ត្រូវគេរាយការណ៍មកដែរថា កំពុងត្រូវគេឃុបឃិតគ្នាវាស់វែងចែកគ្នា ចាប់តាំងពីមន្ត្រីមូលដ្ឋានដល់ថ្នាក់លើ ចំណែកឯលិខិតរបស់សាលាក្រុងមិនមានប្រសិទ្ធភាព ត្រូវបានមជ្ឈដ្ឋានសង្គមរិះគន់ថា ដូចឆាកល្ខោន ។
សេចក្តីរាយការណ៍បានឲ្យដឹងថា ដីនៅជាប់របងព្រលានយន្តហោះនោះត្រូវចៅសង្កាត់ស្មាច់មានជ័យជាមេចំណែកគឺអ្នកតូចបានតូច អ្នកមានតួនាទីធំបានធំ អ្នកឈឺឆ្អាលក្នុងរឿងនេះបានបន្ថែមថា ដីនេះមានទំហំក្បាលដីប្រមាណ ជាង៥០០ម៉ែត្រ និងទទឹងជាង១០ម៉ែត្រ ដែលជាផ្លូវមួយជាប់របងកាកបាទក្រហមខេត្តស្ថិតនៅក្នុងភូមិ១ សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង ។
ទាក់ទិននឹងការសាងសង់កំពង់ផែឯកជន លោកមេភូមិ២បានអោយដឹងតាមទូរស័ព្ទថា កំពង់ផែឯកជនសរុប
មាន៦កន្លែង ទីតាំងកំពុងសាងសង់មានលក្ខណះរឹងមាំមាន ២កន្លែង ចំណែកមានច្បាប់ ឬអត់ច្បាប់នោះ លោក
មេភូមិទី២ថា មិនដឹងទេ ព្រោះគេមិនដែលទំនាក់ទំនងថ្នាក់មូលដ្ឋាន។ ដោយឡែកចៅសង្កាត់ស្មាច់មានជ័យ និង
ចៅសង្កាត់ដងទង់មិនអាចទំនាក់ទំនងសុំការបំភ្លឺបានទេ ។
លោក ហាក់ បូរ៉ា ប្រធានការិយាល័យភូមិបាលក្រុងខេមរភូមិន្ទបានមានប្រសាសន៍យ៉ាងខ្លីថា រឿងកំពង់ផែគឺមានលិខិតអោយផ្អាក៣ដងរួចហើយ ប៉ុន្តែគេនៅតែលួចសាងសង់ដដែល ចំណែកដីនៅជាប់របងព្រលានយន្តហោះនោះលោកមិនដឹងទេ។
លោក ប៉ែន ប៊ុនឈួយ អភិបាលក្រុងស្តីទីបានមានប្រសាសន៏ឲ្យដឹងតាមទូរស័ព្ទថា ទាក់ទិននឹងការសាងសង់កំពង់ផែពិតជាមានមែន ហើយសាលាក្រុងបានចាត់ឲ្យមន្ត្រីទៅពិនិត្យ ហើយថតរូបដើម្បីនឹងចេញលិខិតឲ្យផ្អាកការដ្ឋានជាលើកទី២ និងធ្វើរបាយការណ៏ទៅគណ:អភិបាលខេត្តដើម្បីជ្រាប ។
លោកអភិបាលស្តីទីបានបញ្ជាក់ថា រាល់សំណង់នៅតាមតំបន់ឆ្នេរពុំមានច្បាប់អនុញ្ញាតិអោយសាងសង់ទេ ចំណែកឯដីជាប់របងព្រលានយន្តហោះក៏ដូចគ្នាដែរមានការសាងសង់ខឿន ថ្ម ចំនួន៣ក្បាលដី សាលាក្រុងក៏បានចេញលិខិតជាបន្ទាន់អោយផ្អាកដែរ ហើយបានធ្វើរបាយការណ៏ទៅអភិបាលខេត្តដើម្បីពិនិត្យ និងចាត់ការបន្ត។
គួររំលឹកផងដែរថា ទំនៀមទំលាប់យកដីរដ្ឋ យកប្រឡាយលូបង្ហូរទឹក ធ្វើជាកម្មសិទ្ធផ្ទាល់ខ្លួនពីសំណាក់មន្ត្រី
ខិលខូចមានអំណាច តែងតែកើតឡើងឥតឈប់ឈរស្ទើរតែគ្រប់ខេត្តរាជធានីនៃប្រទេសកម្ពុជា៕
មតិយោបល់