ខេត្តកំពង់ធំ ៖ លោកជា ជាតិ ប្រធានមន្ទីរសង្គមអតីតយុទ្ធជន និងយុវសម្បទា ខេត្តកំពង់ធំ និងជាទីប្រឹក្សារបស់លោកអនុប្រធានរដ្ឋសភាងួន ញ៉ិល ផងនោះត្រូវបាន មន្ត្រីរាជការក្នុងខេត្តរិៈគន់ថា ប្រធានមន្ទីររូបនេះក្រៅតែពីការពូកែខាងការប្រព្រឹត្ត អំពើពុករលួយកឹបកេងថវិកាជាតិ និងកឹបកេងថវិកានិវត្តន៍ជន និងអតីតយុទ្ធជន ប្រធានមន្ទីររូបនេះថ្លើមធំហានទាំងប្លន់ដីរាស្ត្រចំនួន ៥៤ហិចតា នៅចំនុចដីស្រែវាល ក្រោម តំបន់បាទព្រលាក ស្ថិតនៅក្នុងភូមិពោធិតាអ៊ុន សង្កាត់ស្រយូវ ក្រុងស្ទឹងសែន ខេត្តកំពង់ធំ ដែលជាកម្មសិទ្ធិរបស់ប្រជាពលរដ្ឋ៣៤គ្រួសាររំលោភយកធ្វើជាអាងទឹក។
ធ្វើឲ្យប្រជាពលរដ្ឋដែលជាម្ចាស់ដីកើតការក្តៅក្រហាយ និងប្តឹងទៅស្ទើគ្រប់ស្ថាប័នតែមកដល់ពេលនេះពុំទានមានដំណោះស្រាយនៅឡើយនោះទេ។ តាមលោកឃុត នាង និងលោកភោ ភឿក ដែលជាតំណាងឲ្យប្រជាពលរដ្ឋម្ចាស់ដីចំនួន៣៤គ្រួសារបានឲ្យដឹងថាដីដែលលោកជាជាតិ រំលោភយកនោះគឺជាដីស្រែដែលពួកគាតបានកាន់កាប់តាំងពីឆ្នាំ
១៩៨៧ ដោយអ្នកខ្លះទទួលបានដីចំណែកពីរដ្ឋ១ ឬ២ហិចតា ស្រាប់តែនៅដើមឆ្នាំ២០០៦លោកជា ជាតិ បានទៅរំលោភយកជាកម្មសិទ្ធិរបស់គាត និងបានយកដីនេះធ្វើជាអាងទឹកបំរើផលប្រយោជន៍របស់គាត។ ក្រោយពីមានករណីនេះកើតឡើងគឺពួកគាតបានប្តឹងទៅលោកមេឃុំ លោកអភិបាលស្រុកស្ទឹងសែន និងលោកអភិបាលខេត្តរួម និងលោកងួន ញ៉ិល អនុប្រធានរដ្ឋសភាផងដែរ។ តែក្រោយពីការប្តឹងផ្តល់ជាច្រើនកន្លែងរឿងនេះមិនត្រូវបានអជ្ញាធរពាក់ព័ន្ធធ្វើការដោះស្រាយទេ។ នៅឆ្នាំ២០០៨ ពួកគាតបានយករឿងនេះប្តឹងទៅរដ្ឋសភា និងទៅសម្តេចតេជោហ៊ុន សែន ក្រោយពីមានការប្តឹងនេះ រដ្ឋសភាតាមរយៈសម្តេចហេង សំរិនបាន ចេញលិខិតមួយជួនទៅលោកអភិបាលខេត្តកំពង់ធំឲ្យធ្វើការពិនិត្យនិងដោះស្រាយជូនប្រជាពលរដ្ឋ។ ទោះបីមានលិខិតអន្តរាគមន៍របស់រដ្ឋសភាក៍ដោយ អជ្ញាធរខេត្តកំពង់ធំពុំបានយកករណីនេះមកធ្វើការដោះស្រាយជូនប្រជាពលរដ្ឋនោះឡើយ។
សម្រាប់ប្រជាពលរដ្ឋរង់គ្រោះដែលទទ្ទឹងរង់ចំការដោះស្រាយពីអជ្ញាធរទាំងក្តីអស់សង្ឃឹម និងប្រុងលើកគ្នាមកតវ៉ានៅរាជធានីភ្នំពេញ ដើម្បីសូមឲ្យប្រមុខរាជរដ្ឋាភិបាលសម្តេចហ៊ុន សែន ជួយរកយុតិធ៌មជូនពួកគាត។ សម្រាប់មន្ត្រីរាជការជាច្រើននៅខេត្តកំពង់បានទំលាយឲ្យដឹងថាលោកជា ជាតិ ក្រៅតែពីមានបញ្ហាដីធ្លីជាមួយប្រជាពលរដ្ឋ ដោយសារតែអាងខ្លួនជាមន្ត្រីមានអំណាច និងមានខ្សែធំគឺរូបគាតគឺជាមន្ត្រីមួយរូបពោពេញដោយអំពើពុករលួយជាពិសេសគឺការកឹបកេងថវិកាជាតិ កឹបកេងប្រាក់និវត្តន៍ជន និងអតីតយុទ្ធជន។
ស្របពេលដែលរាជរដ្ឋាភិបាលធ្វើកំណែទម្រង់ស៊ីជម្រៅ និងលុបបំបាត់អំពើពុករលួយដោយប្រាក់ខែនិវត្តន៍ជនបើកតាមប្រព័ន្ធធនាគារ រូបគាតនៅតែបន្តការប្រព្រឹត្តអំពើពុករលួយ តាមរយៈការកឹបកេងថវិកាជាតិនៅក្នុងជំពូក៦០ ជំពូក៦១ ជំពូក៦២ មួយផ្នែកនៃជំពូក៦៤ និងជំពូក៦៥ ដោយក្នុងមួយឆ្នាំៗរូបគាតរកប្រាក់បានរាប់រយលានរៀល ដោយផ្គើននឹងការព្រមានរបស់អង្គភាពប្រឆាំងអំពើពុករលួយ។
សូមរំលឹកថានៅឆ្នាំ២០១៣ មន្ទីរសង្គមកិច្ចខេត្តកំពង់ធំបានចំណាយថវិកាជាតិអស់ចំនួន១៣,៣១៦,៨១៦,១១០រៀល ដោយក្នុងនេះចំណាយលើជំពូក៦០អស់ចំនួន៥,៧៨៦,៩១០ រៀល ជំពូក៦១ អស់ទឹកប្រាក់ចំនួន២៧៥,៣៤៨,០០០ រៀល ជំពូក៦២ អស់ទឹកប្រាក់ចំនួន៥១,៤៤១,៨០០ រៀល ចំណាយលើជំពូក៦៤ អស់ចំនួន១២,៦៣៧,៦៦៤,៤០០ រៀល ជំពូក៦៥អស់ទឹកប្រាក់ចំនួន២៧៦,៥៧៥,៨០០ រៀល។
សម្រាប់គម្រោងចំណាយថវិកាដែលបានអនុវត្តន៍ និងកំពង់បន្តអនុវត្តន៍នៅឆ្នាំ២០១៤ នេះមានចំនួន១៨,៤៤០,០ លានរៀល ក្នុងនោះលើជំពូក៦០មានទឹកប្រាក់ចំនួន៦០,០លានរៀល ជំពូក៦១មានទឹកប្រាក់៧៥,០លានរៀល ជំពូក៦២មានទឹកប្រាក់៦០,០លានរៀល ជំពូក៦៤មានទឹកប្រាក់ចំនួន១៧,៩២៥,០លានរៀល ជំពូក៦៥មានទឹកប្រាក់ចំនួន៣២០,០លានរៀល។ ទោះបីថវិកាទាំងនេះមិនទាន់បិទបញ្ចប់ការចំណាយក៍គេអង្កេតឃើញថា ការចំណាយនៅឆ្នាំ២០១៤នេះនៅតែមានប្រព្រឹត្តអំពើពុករលួយដដែលជាដដែលមិនសូវមានការកំណែទម្រង់តាមគោលនយោបាយរាជរដ្ឋាភិបាលទេ។
សម្រាប់ការចំណាយជាក់ស្តែងរបស់មន្ទីរសង្គមកិច្ចជាច្រើនឆ្នាំកន្លងមកថាមានអំពើពុករលួយយ៉ាងធ្ងន់ធ្ងរ ហើយនៅឆ្នាំ២០១៣ ខណៈពេលមានការរឹតបន្តឹងក្នុងការប្រយុទ្ធប្រឆាំងអំពើពុករលួយក៍មន្ទីរមួយនេះនៅតែថ្លើមធំហានប្រព្រឹត្តអំពើពុករលួយដោយមិនខ្លាចក្រែងច្បាប់ ទោះបីថវិកានិវត្តន៍ជនបើកតាមធនាគារក៍នៅតែមានអំពើពុករលួយដោយពួកគេរួមដៃគ្នា ប្រព្រឹត្តអំពើពុករលួយតាមជំពូកជាពិសេសគឺប្រាក់បុរេប្រទាន និងប្រាក់ជំពូក៦៥វិញម្តង។
បើនិយាយពីរឿងអាស្រូវពុករលួយរបស់មន្ទីរសង្គមកិច្ចខេត្តកំពង់ធំ ក្រោមការដឹកនាំដោយលោកជា ជាតិ នោះមានច្រើនប្រភេទហើយរបៀបនៃការប្រព្រឹត្តអំពើពុករលួយគឺមានភាពបតបែនយ៉ាងខ្លាំងដែលអ្នកគ្មានជំនាញខាងហិរញ្ញវត្ថុឃើញគេចែកលុយគ្នានៅនឹងមុខក៍មិនដឹងថាពួកគេបានប្រាក់មកពីណាផង។ ស្របពេលដែលក្រុមអធិការកិច្ច ឬសវនកម្មជើងដប់ចុះទៅត្រួតពិនិត្យតែបញ្ជីស្នាម និងទៅដើរផឹកស៊ីរួមនឹងយកស្រោមសំបុត្រមកវិញនោះគឺរកមិនឃើញនៅកំហុសរបស់ពួកគេទាំងអស់៕
មតិយោបល់