ខេត្តប៉ៃលិន ៖ ពេលថ្មីៗនេះ មន្ត្រីអនុរក្សពន្ធនាគារខេត្តជាង១០នាក់ បានឯកភាពគ្នាផ្តិតមេដៃ ប្តឹងលោក នៅ ធឿង ប្រធានពន្ធនាគារ និងលោកសុខ សារូ អនុប្រធានពន្ធនាគារខេត្ត ពីបទប្រព្រឹត្តអំពើពុករលួយ កេងប្រវ័ញ្ចថវិកា សម្ភារ និងបង្កើតនូវភាពអនាធិបតេយ្យខុសក្រមសីលធម៌ ក្នុងអង្គភាពពន្ធនាគារខេត្ត ។
ដោយយោងតាមពាក្យបណ្តឹង ដែលបញ្ជូន ទៅអង្គភាពប្រឆាំងអំពើពុករលួយ ទៅអគ្គនាយកដ្ឋានពន្ធនាគារនៃក្រសួងមហាផ្ទៃ និងដាក់ចូលទៅលោក ឯម សំអាន រដ្ឋលេខាធិការក្រសួងមហាផ្ទៃ បានរៀបរាប់ឲ្យដឹងថា៖ លោក នៅ ធឿង ប្រធានពន្ធនាគារ និងលោក សុខ សារូ អនុប្រធានពន្ធនាគារខេត្ត បានប្រព្រឹត្តនូវអំពើពុករលួយ មិនតែប៉ុណ្ណោះ បានបង្កើតភាពមិនប្រក្រតីមួយចំនួន ដែលចាប់ផ្តើមតាំងពីឆ្នាំ២០០៤ មកម្លេះ ដោយពាក់ព័ន្ធប្រាក់បៀរត៏វត្តន៏របស់លោកកឿម កើស ជាមន្ត្រីអនុរក្សពន្ធនាគារ មិនដែលបើកឲ្យរហូតមក ។ទើបនៅ ថ្ងៃទី៣១ សីហា ២០១៤ ប្រធានពន្ធនាគារលើកសំណើសុំកាត់ឈ្មោះខ្មោចចេញពីអង្គភាព ។ចំណែក មន្ត្រីអនុរក្សឈ្មោះ ឆាយ ពេង បានទទួលមរណភាពនៅថ្ងៃទី១៧ វិច្ឆិកា ២០១២ ត្រូវបានលោក នៅ ធឿង និងលោក សុខ សារូ កាត់យកលុយគោលនយោបាយគុណនឹងប្រាក់បៀវត្សរ៍ចុងក្រោយចំនួន៦ខែ សូម្បីតែប្រពន្ធកូនរបស់សព តាមសួរច្រើនលើក ក៏ពុំបានផលអ្វីដែរ គឺយកទាំងអស់តែម្តង ។
អនុរក្សពន្ធនាគារម្នាក់ទៀតឈ្មោះ ស៊ុប ពិសិដ្ឋ ត្រូវបានជនទាំងពីរនាក់នេះ កាត់យកប្រាក់បៀវត្សរ៍ អស់រយៈពេល៨ខែ គឺចាប់ពីខែមិថុនា ២០១៣ ដល់ខែមករា ឆ្នាំ២០១៤ ដោយបើកឱ្យត្រឹមតែ១០ម៉ឺនរៀលប៉ុណ្ណោះ ។តាមការចោទប្រកាន់បានបន្តថា អ្នកទាំងពីរឱ្យអ្នកទោសលក់ដូរអនាធិបតេយ្យ និងចងការប្រាក់ លេងល្បែងភ្នាល់បាល់ក្នុងពន្ធនាគារ ។ ទន្ទឹមនឹងនោះ បើនរណាម្នាក់ហ៊ានសួរនាំនោះ លោក នៅ ធឿង បានស្រែក ក្តែងៗថា «ស្រាអញជាអ្នកយកចូល ចង់ប្តឹងទៅណាក៏ប្តឹងទៅ អញមិនខ្លាច» ។ ម្យ៉ាងវិញទៀត ប្រធាន និងអនុប្រធានពន្ធនាគារយកជនជាប់ឃុំទៅធ្វើពលកម្មដោយគ្មានគិតពីថ្ងៃសៅរ៍-អាទិត្យឡើយ សូម្បីតែថ្ងៃបុណ្យចម្រើនព្រះជន្ម ក៏យកជនជាប់ឃុំទៅធ្វើពលកម្មដែរ ។
ពួកគេឱ្យអ្នកទោសមានសិទ្ធិប្រើទូរស័ព្ទទាំងយប់ទាំងថ្ងៃ២៤ម៉ោង ដែលនេះជាបញ្ហាដែលប្រឈមនឹងគ្រោះថ្នាក់បំផុត ។
ប្រភពព័ត៌មានបន្តទៀតថា ៖មេពន្ធនាគារទាំងពីររូបនេះ បានកេងប្រវ័ញ្ចយ៉ាងច្រើនដើម្បីយកជាប្រយោជន៍ផ្ទាល់ខ្លួន ដោយអាងលើអំណាច ធ្វើការសម្លុតគំរាមដកហូត ផ្លាស់ប្តូរទីកន្លែង ទៅលើមន្ត្រីអនុរក្ស ដោយជេរប្រមាថ និងគំរាមកាត់ឈ្មោះចោល ដូច្នេះគ្មាននរណាហ៊ានតវ៉ានោះឡើយ ។ ប្រភពបន្តថា៖ រឿងទាំងអស់ដែលកើតឡើងនៅក្នុងពន្ធនាគារ ជនជាប់ឃុំដឹងទាំងអស់មិនហ៊ាននិយាយទេ ព្រោះខ្លាចអំណាចមេគុកធ្វើទារុណកម្ម ។ចំពោះសម្ភារដែលក្រសួងផ្តល់សម្រាប់អ្នកទោស ប្រធានពន្ធនាគារពុំធ្លាប់បើកឱ្យទេ រួមមានស្បែកជើង ក្រមា មុង ភួយ កន្ទេល ថ្នាំនិងច្រាសដុសធ្មេញ សាប៊ូដុំ សាប៊ូម្សៅ ។ល។
ដោយបើកឱ្យតែខោអាវអ្នកទោស ប៉ុន្តែសម្រាប់អ្នកជំនិតពីរបីនាក់ គឺបើកឱ្យគ្រប់ ក្រៅពីនោះអត់បានទេ ។ អនុរក្សពន្ធនាគារទាំងនេះ បានសំណូមពរសុំធ្វើការផ្លាស់ប្តូរប្រធាន អនុប្រធានពន្ធនាគារទាំងពីររូបខាងលើ ចេញពីអង្គភាពពន្ធគារខេត្តប៉ៃលិន ដើម្បីពង្រឹងការគ្រប់គ្រងអង្គភាពឡើងវិញ ។
ប្រភពដដែលរំលឹកថា លោកនៅ ធឿង ប្រធានពន្ធនាគារខេត្ត ធ្លាប់លេចឮពីការប្រព្រឹត្តអំពើពុករលួយម្តងរួចមកហើយ កាលពីឆ្នាំ២០០៦ ដោយស៊ីដាច់របបមន្ត្រីអនុរក្ស១ឆ្នាំ និងប្រាក់បៀវត្សរ៍១ខែ យកទៅចាយវាយផ្ទាល់ខ្លួន៕
មតិយោបល់