ភ្នំពេញ៖ រឿងខ្នាតធំ លំដាប់អន្តរជាតិ “ព្រលឹង៧ថ្ងៃ” ដែលផលិតដោយផលិតកម្មកូនខ្មែរ Rich Kids Media និង រួមសហការជាមួយនឹងក្រុមហ៊ុន T.I.C ហើយនិងដៃគូសហការពីរប្រទេសផ្សេងគ្នាទៀត គឺ ថៃ និង ម៉ាឡេស៊ី ដែលត្រៀមនឹងវាយលុកទីផ្សារនៅពេលខាងមុខ ខណៈដែលសាច់រឿងថតបាន ៩៥ ភាគរយហើយនោះ ។
ជាមួយនឹងបច្ចេកវិទ្យាដ៏ទំនើប របស់ផលិតកម្ម Rich Kids Media ដែលមិនចាញ់រឿង បរទេសផ្សេងៗ ជាពិសេសតួខ្មោចត្រូវបានតុបតែង ដូចខ្មោចបេះបិទ ដែលប្រើបច្ចេកវិទ្យាលោកខាងលិច និង គំនិតច្នៃប្រឌិតរបស់ខ្លួន បានធ្វើឲ្យ ផ្ទៃរឿងទាំងមូលរន្ធត់ ព្រឺព្រួច សើចក៏សើច អប់រំក៏អប់រំ ។
រឿងខ្មោចបែបកំប្លែង បង្កប់ន័យអប់រំ “ព្រលឹង៧ថ្ងៃ” ផលិតអស់ថវិការាប់ម៉ឺនដុល្លារ ដោយមានតួសម្ដែងល្បីៗដូចជា លោក ទេព រិនដារ៉ូ នាងខ្ញុង កញ្ញា នីមុន្នីនាថ កញ្ញា សុទ្ធ ពេញបរមី និងតួល្បីៗ១៥នាក់ផ្សេងទៀត។
ថ្លែងប្រាប់អ្នកសារព័ត៌មានយើង តាមរយៈទូរស័ព្ទ កាលពីព្រឹកមិញនេះ លោក ជួន សុវណ្ណវាសនា ដែលជាម្ចាស់ភាគហ៊ុន ផលិតកម្ម Rich Kids Media បានឲ្យដឹងថា “រឿងនេះដែរ យើងកំពុងតែរៀបចំជិតហើយៗ ក្នុងនោះយើងថតបានសម្រេច ៩៥ ភាគរយ និងសល់ចំណុចតិចតូចតែប៉ុណ្ណោះ ហើយត្រៀមនឹងវាយលុកទីផ្សារ អាចក្រោយបុណ្យអ៊ំទូក ឬ រើសពេលវេលាល្អមួយ ដែលអាចដាក់បញ្ជាំង តែមិនអាចកំណត់ថ្ងៃបញ្ជាំងនៅឡើយ ។ លោកបន្តទៀតថា រឿងខ្មោចបែបកំប្លែង ព្រឺព្រួច សើចចុកពោះនេះ មានតួប្រុសស្រីចូលរួមថតជាច្រើននាក់ ដោយប្រើរយៈពេលថតប្រមាណជា ៥ខែ ភាគច្រើនប្លង់ថតប្រើពេលយប់ ដោយជួបផលលំបាកច្រើនក្នុងការថត ។ លោកបានបន្ថែមទៀតថា រឿងនេះដែរខុសពីរឿងផ្សេងៗ ព្រោះថា វាបានបញ្ចូលបច្ចេកវិទ្យាបែប សឺរ៉ុនសោន (Surround sound) ដោយសំលេងព្រឺព្រួចនៅជ្រុងណាមួយ នៃរោងកុន និងប្រើបច្ចេកវិទ្យា 3D តិចតូចបំផុត ដោយមិនចាញ់រឿងហូលីវ៉ូតប៉ុន្មានឡើយ ” ។
រំឭកផងដែរថា រឿង “ព្រលឹង៧ថ្ងៃ” នេះ គឺជាសាច់រឿងមួយ សម្រិតសម្រាំង ក្នុងការថត ដើម្បី ទុកប្រកួត ក្នុងពានរង្វាន់ខ្សែភាពយន្ត អាស៊ី នៅពេលខាងមុខ ។
ជាចុងក្រោយលោក ជួន សុវណ្ណវាសនា បានថ្លែងឲ្យដឹងថា “ការចូលរួមចំណែកទស្សនា រឿងខ្មោចបែបកំប្លែងរបស់ទស្សនិកនៅពេលខាងមុខ គឺជាការចូលរួមបរិច្ចាគទឹកប្រាក់ទៅកាន់មន្ទីរពេទ្យគន្ធបុប្ជា ជាមួយនឹងផលិតកម្ម Rich Kids Media ” ។
តើលោកអ្នកពិតជាមិនអាចរងចាំទស្សនាមែនទេ ? ហើយចូលរួមទស្សទាយទាំងអស់គ្នាថា សាច់រឿងដ៏ល្អ សម្រាប់ប្រកួត ពានរង្វាន់ខ្សែភាពយន្ត អាស៊ី ផលិតអស់ខ្ទង់ប៉ុន្មានម៉ឺនដុល្លារដែរ ?
មតិយោបល់