ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាសង្ឃឹមថា គ្មានសម្ពាធណាមួយ ដាក់ទណ្ឌកម្មលើកម្ពុជា ដោយគ្រាន់តែកម្ពុជាមានសេរីភាព ក្នុងការធ្វើទំនាក់ទំនងជាមួយ ចិន នោះទេ។
ការថ្លែងបែបនេះរបស់សម្តេចតេជោហ៊ុនសែន បានធ្វើឡើង បន្ទាប់ពីសហរដ្ឋអាមេរិក កាលពីពេលថ្មីៗនេះ បានបង្ហាញអំពីទណ្ឌកម្មរបស់ខ្លួន មកលើរាជរដ្ឋាភិបាលកម្ពុជា ដោយប្រកាសមិនលក់អាវុធមកឱ្យប្រទេសកម្ពុជា ដោយចោទរាជរដ្ឋាភិបាលកម្ពុជា រំលោភសិទ្ធិមនុស្ស និងមាន ទំនាក់ទំនងស្អិតល្មួតជាមួយចិន។
ថ្លែងក្នុងពិធីបើកសម្ពោធវិមានកីឡដ្ឋាន នៃពហុកីឡដ្ឋានជាតិមរតកតេជោ និងពិធីរាប់ថយក្រោយ ៥០២ថ្ងៃ ដំណើរឆ្ពោះទៅកាន់ព្រឹត្តិការណ៍ ប្រកួតកីឡា SEA Games-ASEAN Para Games ឆ្នាំ២០២៣ នៅរាជធានីភ្នំពេញនៃព្រះរាជាណាចក្រកម្ពុជា នៅព្រឹកថ្ងៃទី១៨ ខែធ្នូ ឆ្នាំ២០២១ សម្តេចតេជោ ហ៊ុន សែន បានមានប្រសាសន៍ថា ជំនួយរបស់មិត្តចិន មិនមែនសម្រាប់អភិវឌ្ឍន៍សេដ្ឋកិច្ច-សង្គម ប៉ុណ្ណោះទេ ប៉ុន្ដែជំនួយនេះ ក៏បានជួយដល់ការពង្រឹង ឯករាជ្យ អធិបតេយ្យភាព ខាងនយោបាយរបស់កម្ពុជា ផងដែរ។
សម្តេចតេជោ បានបញ្ជាក់ថា គ្មានសម្ពាធណាផ្សេងទៀត មកដាក់បន្ថែមលើកម្ពុជានោះទេ ដោយគ្រាន់តែកម្ពុជាមានទំនាក់ទំនងជាមួយចិននោះ ។
« ខ្ញុំសង្ឃឹមថា មិនមានសម្ពាធណាផ្សេងទៀត ដែលតម្រង់ឆ្ពោះមកដាក់ទណ្ឌកម្មមកលើកម្ពុជា ដែលគ្រាន់តែកម្ពុជាមានសេរីភាព ក្នុងការធ្វើទំនាក់ទំនងជាមួយសាធារណរដ្ឋប្រជាមានិតចិន នោះទេ ។ ពិតណាស់ហើយថ្ងៃនេះ អ្នកខ្លះអាចលើកឡើងថា វាជាការផ្គើនជាមួយ បទបញ្ជាពីខាងក្រៅ ដែលហាមឃាត់ទាក់ទងរវាង កម្ពុជា ជាមួយចិន ដែលយើងធ្វើពិធីដ៏អធិកធមមួយ ទោះបីក្រោមសម្ពាធកូវីដក៏ដោយ » ។
សូមបញ្ជាក់ថា វិមានកីឡដ្ឋាន គឺជាសំណង់ធំជាងគេក្នុងចំណោមសំណង់នានា នៅក្នុងពហុកីឡដ្ឋានជាតិមរតកតេជោ ស្ថិតក្នុងសង្កាត់ ព្រែកតាសេក ខណ្ឌជ្រោយចង្វារ រាជធានីភ្នំពេញ ដោយទទួលបានថវិកាជាជំនួយឥតសំណងសម្រាប់ការសាងសង់ពីរដ្ឋាភិបាលចិន ក្នុងទំហំទឹកប្រាក់ប្រមាណ១៦០លានដុល្លារ។ វិមានកីឡដ្ឋាននេះ បានសាងសង់លើទំហំផ្ទៃដីប្រមាណ ១៦.២២ហិកតា ទំហំសំណង់ប្រហែល ៨.២៤ម៉ឺនម៉ែត្រក្រឡា គឺជាកីឡដ្ឋានខ្នាតធំដែលអាចផ្ទុកអ្នកទស្សនាបានរហូតដល់ ៦ម៉ឺននាក់ ហើយមានសមត្ថភាពទទួលរៀបចំព្រឹត្តិការណ៍ ប្រកួតកីឡាថ្នាក់ជាតិ និងអន្តរជាតិធំៗកម្រិតពិភពលោក ពិសេសនឹងក្លាយជាកីឡដ្ឋានដ៏សំខាន់ សម្រាប់ត្រៀមស្វាគមន៍ការប្រកួតកីឡា ស៊ីហ្គេម និងអាស៊ានប៉ារ៉ាហ្គេម នៅកម្ពុជា នាឆ្នាំ២០២៣ខាងមុខ៕
![](https://i0.wp.com/domneng.news/wp-content/uploads/2021/12/267733437-463260268491477-4910512909626538845-n.jpg?resize=1000%2C667&ssl=1)
![](https://i0.wp.com/domneng.news/wp-content/uploads/2021/12/267502915-463260088491495-321582732856108652-n.jpg?resize=1000%2C667&ssl=1)
![](https://i0.wp.com/postnews.com.kh/wp-content/uploads/2016/12/photo_2016-12-19_10-14-13.jpg?fit=1000%2C750&ssl=1)
![](https://i0.wp.com/postnews.com.kh/wp-content/uploads/2016/12/photo_2016-12-19_10-14-14.jpg?fit=1000%2C750&ssl=1)
![](https://i0.wp.com/domneng.news/wp-content/uploads/2021/12/269390233-4645877652173677-4250129296216284934-n-1.jpg?resize=750%2C1000&ssl=1)
![](https://i0.wp.com/domneng.news/wp-content/uploads/2021/12/269550154-4645876498840459-7384984080564827208-n-1.jpg?resize=1000%2C750&ssl=1)
![](https://i0.wp.com/domneng.news/wp-content/uploads/2021/12/268628667-4645875275507248-4397456329769336670-n-1.jpg?resize=750%2C1000&ssl=1)
![](https://i0.wp.com/domneng.news/wp-content/uploads/2021/12/269436336-4645871755507600-1061775678091566400-n-1.jpg?resize=1000%2C750&ssl=1)
មតិយោបល់