ព្រៃវែង៖កម្លាំងសមត្ថកិច្ចចម្រុះ ដឹកនាំដោយព្រះរាជអាជ្ញារងសាលាដំបូងខេត្តព្រៃវែង បានចុះអនុវត្ត សាលដីកាសាលាឧទ្ឋរណ៏ ដោយបានចាប់ម្ចាស់ទ្រព្យជាស្ត្រីទន់ខ្សោយដាក់ខ្នោះ ព័ទ្ឋរបងមិនឲ្យសាធារណ:ជនចូលរួមមើល ដើម្បីរុះរៃទ្រព្យសម្បត្តិចេញ យកដីទៅឲ្យអតីតកូនប្រសារ។
ការអនុវត្តសាលដីកាដឹកនាំដោយលោក ឈឺន សុផុន ព្រះរាជអាជ្ញារងអមសាលាដំបូងខេត្តព្រៃវែង កាលពីព្រឹកថ្ងៃទី២២ ខែតុលា ឆ្នាំ២០១៤ ស្ថិតក្នុងការ៉ាស់សាំងលើដីឡូមួយកន្លែង ស្ថិតក្នុងភូមិស្ទឹងស្លូត ឃុំអ្នកលឿង ស្រុកពាមរ ខេត្តព្រៃវែង។ ដែលមានម្ចាស់ការ៉ាស់សាំង ឈ្មោះផាន់ សាក់ និងម្ចាស់បណ្ដឹងដែលជាអតីកូនប្រសារឈ្មោះ ឆេង សុខបូរ។
លោកស្រី ផាន់ សាក់ ដែលជាម្ចាស់ការរ៉ាស់សាំងបានយំស្រែក មិនព្រមឲ្យកម្លាំងសមត្ថកិច្ច រុះរើសទ្រព្យសម្បត្តិគាត់ចេញពីដីនោះឡើយ ដោយគាត់បានអះអាងថា លោកព្រះរាជអាជ្ញា មិនបានជូនដំណឹងដល់គាត់ជាមុននោះទេ ហើយបណ្តឹងនោះធ្វើឡើងរវាងកូនស្រី របស់គាត់ និងអតីតកូនប្រសាររបស់គាត់ តាំងពីពេលដែលពួកគេរួមរស់ជាមួយគ្នា មិនពាក់ព័ន្ឋនិងទ្រព្យសម្បត្តិដីធ្លីដែលគាត់សាងសង់ការ៉ាស់សាំងនោះទេ។
លោកស្រីបញ្ជាក់ថា អតីតកូនប្រសាររបស់គាត់បានប្រគល់ដីនេះ ដោយផ្តល់ទាំងប័ណ្ណកម្ម សិទ្ឋិមកឲ្យគាត់ ដើម្បីកាត់កងប្រាក់ដែលជំពាក់ជាង៣ម៉ឺនដុល្លារ ដែលកូនប្រសារនោះជំពាក់។ ហើយថាដីនោះ ត្រូវបានកាត់ចូលជាដីចំណីផ្លូវអស់ទៅហើយ មិនមានដីនៅសល់១៤០០ ម៉ែត្រការដូចអតីតកូនប្រសារប្តឹងនោះទេ។ ការសាងសង់ការ៉ាស់សាំងគឺធ្វើនៅលើដីផ្ទាល់ខ្លួន របស់គាត់ផ្នែកខាងក្រោយប៉ុណ្ណោះ។
លោក ឈឺន សុផុន ព្រះរាជអាជ្ញារងអមសាលាដំបូងខេត្តព្រៃវែង មិនបានអានសាលដីការនៅចំពោះមុខម្ចាស់ទ្រព្យលោកស្រី ផាន់ សាក់ នោះឡើយ ហើយក៏មិនបានផ្តល់បទសម្ភាសន៏ ដល់អ្នកសារព័ត៌មាននៅពេលដឹកនាំកម្លាំងចុះរុះរើនោះដែរ ដោយលោកនិយាយខ្លីថា ការដឹកនាំកម្លាំងគឺអនុវត្តតាមសាលដីកាស្ថាពរ របស់សាលាឧទ្ឋរណ៏ប៉ុណ្ណោះ ហើយបានត្រឹមឲ្យក្រឡាបញ្ជីរបស់លោក អានដីកាស្ថាពររបស់សាលាឧទ្ឋរណ៏ប៉ុណ្ណោះ។ ភ្លាមៗនេះសារព័ត៌មានក៏មិនអាចសុំការបំភ្លឺ ពីអតីតកូនប្រសារឈ្មោះ ឆេង សុខបូរនោះឡើយ ។
គួរបញ្ជាក់ថា ការអនុវត្តសាលដីការលោកព្រះរាជអាជ្ញាមិនបាន អានសាលដីកានៅចំពោះ មុខម្ចាស់ទ្រព្យ គ្រាន់តែយកកម្លាំងមកព័ទ្ឋហើយចាប់ម្ចាស់ទ្រព្យដាក់ខ្ចោះ បញ្ជាឲ្យកម្មករវាយរុះរើការ៉ាស់សាំងនោះតែម្តង។ ហើយរហូតដល់ម៉ោងជិត២រសៀល នៅពេលកម្លាំងសមត្ថកិច្ចនិងកម្មករបានរុះរើ ទ្រព្យសម្បត្តិការ៉ាស់សាំងរួចរាល់ ទើបដោះខ្នោះចេញវិញ ហើយករណីនេះលោកស្រី ផាន់ សាក់ បញ្ជាក់ថា លោកស្រីនឹងដាក់ពាក្យបណ្តឹងតបទៅស្ថាប័នពាក់ព័ន្ឋដើម្បីឲ្យជួយរកយុត្តិធម៌ចំពោះរូបគាត់វិញ៕
មតិយោបល់