ភ្នំពេញ ៖ ប្តីប្រពន្ធវ័យក្មេងមួយគូជិះម៉ូតូឌុបគ្នាដើរលេងត្រូវដើមឈើមួយដើមរលំសង្កត់ពីលើបណ្តាលឱ្យប្រពន្ធបែកក្បាលហូរឈាមសន្លប់នៅនឹងកន្លែងកើតហេតុ ចំណែកប្តីរងរបួសស្រាល ។ ហេតុការណ៍នេះកើតឡើង១១ និង៤០នាទីយប់ ថ្ងៃទី២៧ តុលា ២០១៤ នៅទល់មុខស្តង់បុរីកីឡាថ្មីស្ថិតនៅតាមផ្លូវលេខ១៨២ សង្កាត់វាលវង់ ខណ្ឌ៧មករា ។
ជនរងគ្រោះទី១. ឈ្មោះ ធូធូ ភេទស្រី អាយុ២៤ឆ្នាំ មុខរបរជានារីបំរើការក្នុងហាងខារ៉ាអូរខេររបួស បែកក្បាលសន្លប់ ចំណែកទី២.ឈ្មោះ នេ លីងយាំង ភេទប្រុសអាយុ២៤ឆ្នាំ របួសស្រាល ។ ទាំងពីរនាក់ ស្នាក់នៅផ្ទះជួលនៅក្នុងសង្កាត់ចាក់អង្រែលើខណ្ឌមានជ័យ ។
ប្រភពព័ត៌មានពីប្រជាពលរដ្ឋដែលបានឃើញហេតុការណ៍បានឱ្យដឹងថា នៅមុនពេលកើតហេតុគាត់បានឃើញជនរងគ្រោះពីរនាក់ប្តី-ប្រពន្ធ វ័យក្មេងមួយគូជិះម៉ូតូម៉ាកហុងដាឌ្រីមសេ១២៥ ពណ៌ខ្មៅ មួយគ្រឿងពាក់ស្លាកលេខភ្នំពេញ 1CM-6256 ដោយធ្វើដំណើរតាមផ្លូវ១៨២ ខណៈមកដល់ចំណុចកើតហេតុម្តុំលក់ផ្កានិងបាយសី ស្រាប់តែត្រូវដើមឈើមួយដើមរលំមកលើផ្លូវហើយចុងរបស់វាបានសង្កត់មកលើជនរងគ្រោះទាំងពីរនាក់ប្តី-ប្រពន្ធ បណ្តាលឱ្យប្រពន្ធរបួសបែកក្បាលហូរឈាម សន្លប់នៅនឹងកន្លែងចំណែកបុរសជាប្តីគ្រាន់តែរបួសស្រាលប៉ុណ្ណោះ។ ប្រភពព័ត៌មានបានបន្តឱ្យដឹងទៀតថា បន្ទាប់ពីដើមឈើនោះរលំស្រាប់តែមានមនុស្សមួយក្រុមទៀតជិះម៉ូតូប្រហែល៣គ្រឿងបានជិះយ៉ាងលឿន មកដល់វ៉ាក់អឺ ជាមួយដើមឈើដែលលំមកលើផ្លូវនោះក៏បានចាប់ហ្វ្រាំងទាំងបង្ខំបណ្តាលឱ្យដួលម៉ូតូគរលើគ្នារបួសស្រាលហើយក៏នាំគ្នាលើកម៉ូតូជិះទៅបាត់ ។ក្រោយពេលហេតុសមត្ថកិច្ចបានចុះមកពិនិត្យកន្លែងកើតហេតុនិងបានបញ្ជូនជនរងគ្រោះទៅសង្គ្រោះនៅមន្ទីរពេទ្យ ៕
មតិយោបល់