កំពង់ឆ្នាំង៖បុរស៣នាក់បានរងរបួសធ្ងន់និងស្រាលនៅក្នុងករណីគ្រោះថ្នាក់ចរាចរណ៍រវាងម៉ូតូនិងម៉ូតូបុកគ្នាពេញទំហឹង នៅផ្លូវបែកជាបួន វេលាម៉ោង៩និង១៥នាទីព្រឹកថ្ងៃទី២៨ ខែ តុលា ឆ្នាំ២០១៤ ស្ថិតនៅក្នុងភូមិម៉ុងបារាំង សង្កាត់ប្អេរ ក្រុងកំពង់ឆ្នាំង ។
សមត្ថកិច្ចនគរបាលចរាចរណ៍ក្រុងកំពង់ឆ្នាំងបានអោយដឹងថា៖អ្នករងរបួសទាំង៣នាក់នោះមានឈ្មោះ ១.លី ណា ភេទប្រុស អាយុ២៧ឆ្នាំ រស់នៅក្នុងភូមិកណ្តាល សង្កាត់កំពង់ឆ្នាំង ក្រុងកំពង់ឆ្នាំង បើកម៉ូតូម៉ាកស្កុបពី ពណ៌ក្រហម ពាក់ស្លាកលេខ កំពង់ឆ្នាំង 1C-7344 ,២.ឈ្មោះ ប្រាក់ យ័ន ភេទប្រុស អាយុ៣៥ឆ្នាំ ជាអ្នកបើកបរម៉ូតូម៉ាកហុងដាសេ១២៥ ពណ៌ខ្មៅ ពាក់ស្លាកលេខ កំពង់ស្ពឺ 1B-4620 និងទី៣ឈ្មោះ សេង ចាន់ធូ អាយុ៣៤ឆ្នាំ ជាអ្នកអង្គុយពីក្រោយឈ្មោះ ប្រាក់ យ័ន អ្នកទាំង២រស់នៅក្នុងភូមិត្រពាំងចឹក្សា សង្កាត់ កំពង់ឆ្នាំង ក្រុងកំពង់ឆ្នាំង។
មុនពេលកើតហេតុគេឃើញអ្នកជិះម៉ូតូស្កុបពីបានបើកយ៉ាងលឿនពីកើតទៅលិច លុះដល់ចំណុចកើតហេតុ ក៍បានបុកចំទទឺងម៉ូតូហុងដាឌ្រីមសេ១២៥ ដែលបានបើកបរ ពីជើងទៅត្បូងក្នុងល្បឿនយ៉ាងលឿនដូចគ្នាពេញទំហឹង បណ្តាលអោយអ្នកទាំង៣រង របួសធ្ងន់និងស្រាលទាំងអស់គ្នា។
ក្រោយពេលកើតហេតុ សមត្ថកិច្ចបានហៅរថយន្តសង្គ្រោះមកដឹកបញ្ជូនជនរងគ្រោះទាំងបីនាក់ទៅកាន់មន្ទីរពេទ្យខេត្តកំពង់ឆ្នាំងដើម្បីជួយសង្គ្រោះជីវិត។ដោយឡែកឈ្មោះ សេង ចាន់ធូ ដែលរងរបួសធ្ងន់ជាងគេ ដូចជាមានសង្ឃឹមរស់តិចណាស់ ព្រោះគេបាន រងរបួស ផ្នែកក្បាលយ៉ាងធ្ងន់ធ្ងរ និងបានហូរឈាមតាមច្រមុះ និងត្រចៀករហូត។
ម៉ូតូទាំង២គ្រឿង ត្រូវសមត្ថកិច្ចជំនាញដឹកយកមករក្សាទុកក្នុងអធិការដ្ឋាននគរបាលក្រុងកំពង់ឆ្នាំង ដើម្បីកសាងសំណុំរឿងដោះស្រាយតាមនីតិវិធី។ករណីគ្រោះថ្នាក់ខាងលើនេះត្រូវបានគេសន្និដ្ឋានថា៖អ្នកបើកបរម៉ូតូទាំង២គ្រឿងនេះបើកបរហួសល្បឿនកំណត់ នៅផ្លូវបែកជា៤ក្នុងទីប្រជុំជន ទើបបង្កអោយមានគ្រោះថ្នាក់ធ្ងន់និងស្រាលដល់ខ្លួនឯងបែបនេះ៕
មតិយោបល់