កំពង់ចាម៖ នៅព្រឹកថ្ងៃទី៣១ ខែតុលា ឆ្នាំ២០១៤នេះ មន្ត្រីសាខាគយ និងរដ្ឋាករខេត្តកំពង់ចាមបានចុះផ្សព្វផ្សាយពន្យល់ដល់អាជីវកម្មដ្ឋានលក់ម៉ូតូ ក្នុងទីផ្សារទីរួមខេត្តកំពង់ចាមទាំងអស់ ដើម្បីឲ្យក្រុមអាជីវករ យល់ពីការបង់ប្រាក់ពន្ធ អាករ និងពិន័យដែលត្រូវបង់ លើទោចក្រយានយន្តប្រភេទប្រើរួចមានស្រាប់នៅក្នុងប្រទេស ។
លោក លឹម វណ្ណនី អនុប្រធានការិយាល័យសាខាគយ និងរដ្ឋាករ ខេត្តកំពង់ចាមបានមានប្រសាសន៍ថា ចំពោះយុទ្ធនាការផ្សព្វផ្សាយ គឺបានធ្វើរយៈពេល៣ថ្ងៃគិតទាំងថ្ងៃទី៣១ ខែតុលា ឆ្នាំ២០១៤នេះ គឺយើងបានផ្សព្វផ្សាយ តាមវិទ្យុ និងទូរទស្សន៍ ក្នុងខេត្តកំពង់ចាម ហើយថ្ងៃនេះកម្លាំងយើងបានចុះដល់អាជីវកម្មដ្ឋាន ក្នុងទីផ្សារទីរួមខេត្តកំពង់ចាម ដើម្បីពន្យល់ និងចែក ឯកសាររបស់អគ្គនាយកដ្ឋានគយ និងរដ្ឋាករកម្ពុជា១ច្បាប់ ភ្ជាប់ដោយគំរូពាក្យសុំបង់ទោចក្រយានយន្តចំនួន២ តារាងប្រាក់ពន្ធ និងពិន័យដែលត្រូវបង់ មានឆ្នាំម៉ូតូដែលផលិតមុនឆ្នាំ២០១៥ ។
លោក អនុប្រធានការិយាល័យបានបញ្ជាក់ទៀតថា ថ្ងៃនេះកម្លាំងគយ មិនមែនចុះមកចាប់ម៉ូតូគេចពន្ធទេ គឺចុះមកផ្សព្វផ្សាយពីច្បាប់បង់ពន្ធលើទោចក្រយានយន្តសិន និងមានការបិទផ្សាយទូលាយនៅមុខសាខាគយ និងរដ្ឋាករខេត្ត ។ ហើយបើម្ចាស់អាជីវកម្មដ្ឋាន លក់ដុំ និងរាយ និងអ្នកប្រើប្រាស់ផ្ទាល់ខ្លួន មិនព្រមបង់ពន្ធទេនោះ យើងមានវិធានការអនុវត្តន៍តាមបទបញ្ញតិ ដែលបានផ្សព្វផ្សាយ យើងបង្ក្រាប ចាប់រឹបអូសយកមកបង់ពន្ធចូលរដ្ឋតែម្តង ។ យើងបានបញ្ជៀត បង្កប់កម្លាំង សម្ងាត់រួចហើយ តែមុននឹងយើងធ្វើអី យើងត្រូវផ្សព្វផ្សាយ ឲ្យមានការចូលរួមពីប្រជាពលរដ្ឋ បានដឹងពីគោលបំណងដែលយើងត្រូវធ្វើ ។
សូមបញ្ជាក់ថា ចំពោះម្ចាស់ទោចក្រយានយន្ត ដែលចូលខ្លួនដោយស្ម័គ្រចិត្តមកបំពេញកាតព្វកិច្ចពន្ធអាករ នឹងទទួលបានការអនុគ្រោះបន្ថយប្រាក់ពិន័យ ២០% នៃប្រាក់ពិន័យសរុប ។
ចំពោះទោចក្រយានយន្តដែលមានសភាពទ្រុឌទ្រោមខ្លាំង សាខាគយ និងរដ្ឋាកររាជធានី-ខេត្តពាក់ព័ន្ធ អាចសម្រេចអនុគ្រោះនៅនឹងកន្លែង នូវកម្រិតពន្ធអាករនិងប្រាក់ពិន័យដែលត្រូវបង់ ៕
មតិយោបល់