ភ្នំពេញ: អង្គភាពប្រឆាំងអំពើពុករលួយ ហៅកាត់ថា ACU បានឲ្យដឹងថា ក្នុងរយ:ពេលបីឆ្នាំ ចាប់ពីឆ្នាំ២០១៣ ដល់ឆ្នាំ២០១៥ ACU បានសម្រេចជោគជ័យក្នុងការលុបបំបាត់ការយកកម្រៃសេវាក្រៅច្បាប់ និងការរៀបចំកម្រៃសេវាតាមច្បាប់នៅ ២០ក្រសួងស្ថាប័ន ដែលមានសេវាសាធារណ: និងបានធ្វើឲ្យចំណូលរដ្ឋមានការកើនឡើងជាង ១៨៦លានដុល្លារទៀតផង។

ការប្រកាសសម្រេចជោគជ័យនៃការលុបបំបាត់ការយកកម្រៃសេវាក្រៅច្បាប់នេះ បានធ្វើឡើងនៅក្នុងកិច្ចប្រជុំលើកទី១៤ អាណត្តិទី២ របស់អង្គភាពប្រឆាំងអំពើពុករលួយ នៅថ្ងៃទី៣១ ខែសីហានេះ ដោយមានការចូលរួមពីលោក តុប សំ ប្រធានក្រុមប្រឹក្សាជាតិប្រឆាំងអំពើពុករលួយ, លោក ឱម យ៉ិនទៀង ប្រធានអង្គភាព និងមន្រ្តីពាក់ព័ន្ធជាច្រើននាក់ទៀត។

នៅក្នុងកិច្ចប្រជុំនោះដែរ លោក ឱម យ៉ិនទៀង ប្រធាន ACU បានឲ្យដឹងថា នៅក្នុងខែសីហា អង្គភាពក៏បានទទួលពាក្យបណ្តឹងចំនួន ៦០ពាក្យ ដោយក្នុងនោះបណ្តឹងអនាមិកមានចំនួន ២៤ពាក្យ ស្មើនឹង ៤០ភាគរយ។ បញ្ហានេះអង្គភាពប្រឆាំងអំពើពុករលួយបានសុំឲ្យសាមីស្ថាប័ន សាមីខ្លួនរងការចោទប្រកាន់ បំភ្លឺចំនួន ១៦ពាក្យបណ្តឹង។ នៅក្នុងនោះដែរ មានពាក្យបណ្តឹងចំនួន ៤០ មិនជាប់ពាក់ព័ន្ធនឹងសមត្ថកិច្ចរបស់ ACU ទទួលពាក្យបំភ្លឺចំនួន ៣៨ពាក្យ៕