ខេត្តកំពត: ឥឡូវនេះហាងឆេងជ្រូករស់ត្រូវបានក្រុមឈ្មួញទម្លាក់តម្លៃជាបន្តបន្ទាប់ ប៉ុន្តែចំណីឬអាហារបំប៉នគ្រប់ប្រភេទបែរជាឡើងថ្លៃហួសហេតុធ្វើឲ្យប្រជាពលរដ្ឋដែលចិញ្ចឹមជ្រូកស្ថិតតាមតំបន់នានាជួបបញ្ហាលំបាក។
ជាទូទៅការលក់ជ្រូករស់កាលពីដើមខែវស្សាកន្លងមកគឺមានតម្លៃខ្ពស់បើប្រៀបធៀបគ្នាទៅខុសគ្នាដូចមេឈនិងដី ដែលជាកក្តាមួយដ៏សំខាន់ក្នុងការលើកស្ទួយកម្រិតជីវភាពប្រជាពលរដ្ឋក្នុងមូលដ្ឋាននីមួយៗកាន់តែមានភាពរីកចម្រើនពីមួយថ្ងៃទៅមួយថ្ងៃ។
អ្នកចិញ្ចឹមជ្រូកជាច្រើនបានលើកឡើងថា កាលឆ្នាំមុនការលក់ជ្រូករស់១គីឡូក្រាមបានកម្រៃចាប់ពី១០៧០០ទៅ១១០០០រៀលប៉ុន្តែបច្ចុប្បន្នជ្រូកសាច់រស់នៅត្រឹមតម្លៃ៧៥០០ទៅ៨០០០រៀលប៉ុណ្ណោះ។នេះបើយើងប្រៀបធៀបគ្នានឹងការលក់ជ្រូកពេលនេះសឹងតែខុសគ្នាពាក់កណ្តាលទៅហើយ រីឯអាហារឬចំណីបំប៉នគ្រប់ប្រភេទនៅតែតម្លៃថ្លៃដដែល។ចំណែកកូនជ្រូកដែលលក់តាមផ្សារឬក្នុងសំបុកតាមផ្ទះក៏មានតម្លៃខ្ពស់មិនខុសពីមុនឡើយ។គេបានឲ្យដឹងទៀតថា ឥឡូវនេះជ្រូកនៅតាមផ្ទះប្រជាពលរដ្ឋជាច្រើនត្រូវក្រុមឈ្មួញសំរុកទិញស្ទើគ្រប់កន្លែង ប៉ុន្តែមិនឲ្យតម្លៃលើសពី៨០០០រៀលក្នុង១គីឡូក្រាមនោះឡើយ ហើយពួកគាត់ក៏សុខចិត្តលក់ដោយពុំមានចិត្តរារែក ព្រោះខ្លាចថ្ងៃក្រោយជ្រូករិតតែចុះថ្លៃបន្តទៀត។ពួកគាត់បានបញ្ជាក់ដូចគ្នាថា បើជ្រូករស់ចុះថ្លៃតែចំណីបំប៉នកាន់តែឡើងថ្លៃបែបនេះគឺសុខចិត្តលក់ជ្រូកនៅជំទើៗប្រសើរជាង បើទុកចាំឲ្យធំដល់១០០គីឡូក្រាមខ្លាចក្រែងកាន់តែខាតថវិកាកាន់តែច្រើន ទើបបបួលគ្នាលក់ឲ្យអស់ពីទ្រុងតែម្តង។
ដោយសារតែតម្លៃជ្រូករស់កាន់តែចុះថោកប៉ុន្តែចំណីបំប៉នបែជាឡើងថ្លៃយ៉ាងនេះ ប្រជាពលរដ្ឋគ្រប់តំបន់ក្នុងខេត្តកំពត បាននិងកំពុងព្រួយបារម្មណ៍កាន់តែខ្លាំង ព្រោះការចិញ្ចឹមជ្រូកសព្វថ្ងៃបានត្រឹមតែបានប្រាក់សម្រាប់ទូទាត់តែថ្លៃចំណីរបស់វា ចំណែកប្រាក់ចំណេញគឺនៅសេសសល់មិនបាន១០%ផង៕
មតិយោបល់