យុវជនមួយក្រុម ជិះម៉ូតូដេញកាប់ និងបាញ់យុវជនមួយក្រុមទៀត តាមដងផ្លូវយ៉ាងអាណាធិបតេយ្បណ្តាលឱ្យយុវជន២នាក់ រងរបួសធ្ងន់ ត្រួវបានគេបញ្ជូនទៅសង្គ្រោះបន្ទាន់ នៅមន្ទីរពេទ្យកាល់ម៉ែត្រ។
ហេតុការណ៍នេះ បានបង្កឱ្យមានការភ្ញាក់ផ្អើលនៅចំណុចគល់ស្ពាន ព្រះមុនីវង្សថ្មី ត្រើយខាងកើត ស្ថិតនៅក្នុងសង្កាត់ច្បារអំពៅ ខណ្ឌច្បារអំពៅ ។យុវជនរងគ្រោះទី១. ឈ្មោះ ហ៊ុយ វណ្ណធាង អាយុ២២ឆ្នាំ ត្រូវគេបាញ់ចំចំនួន៣គ្រាប់ ដោយមួយគ្រាប់ចំដៃខាងឆ្វេង និងពីរគ្រាប់ទៀតចំភ្លៅ រងរបួសធ្ងន់ ចំណែកជនរងគ្រោះទី២.ឈ្មោះ រស់ សំបូរ ភេទប្រុស អាយុ២១ឆ្នាំ ត្រូវមួយគ្រាប់ចំដៃខាងស្តាំ បណ្តាលឱ្យដួលម៉ូតូបាក់ដៃស្តាំរបួសធ្ងន់តែម្តង ។
ប្រភពព័ត៌មាន ពីកន្លែងកើតហេតុ បានឱ្យដឹងថា នៅមុនពេលកើតហេតុ មានយុវជនពីក្រុមជិះម៉ូតូដេញគ្នាតាំងពីសង្កាត់ ចាក់អង្រែក្រោម តាមផ្លូវជាតិលេខ២ ឆ្ពោះទៅកាន់ផ្លូវជាតិលេខ១ ដោយឆ្លងកាត់ស្ពានព្រះមុនីវង្សថ្មី ខណៈមកដល់គល់ស្ពានព្រះមុនីវង្សថ្មីត្រើយខាងកើត គេឃើញភាគីក្រុមយុវជនដែលជិះម៉ូតូដេញតាមពីក្រោយបានដកកាំភ្លើង បាញ់ភាគីក្រុមយុវជនមួយក្រុមទៀត បណ្តាលឱ្យរបួសធ្ងន់ពីរនាក់ ដោយម្នាក់ត្រូវគ្រាប់កាំភ្លើងចំនួនបីគ្រាប់ និងម្នាក់ទៀតត្រូវមួយគ្រាប់ ។
ទាក់ទិននិងហេតុការណ៍នេះ សមត្ថកិច្ចមិនទាន់សន្និដ្ឋានថា ជាករណីគំនុំ ឬក៍ជាករណីបាញ់ប្លន់នោះទេ ។ ចំណែកឯក្រុមគ្រួសារជនរងគ្រោះ បានព្យាយាមលាក់បាំងព័ត៌មានផងដែរ ។ក្រោយពេលកើតហេតុ ក្រុមយុវជនបង្ក បានជិះម៉ូតូគេចខ្លួនអស់ ចំណែកយុវជនរងគ្រោះ ត្រូវគេបញ្ជូនទៅសង្គ្រោះនៅមន្ទីរពេទ្យកាល់ម៉ែត្រ ៕
មតិយោបល់